Jańadan ashylǵan «Baqytty shańyraq» oqytý-ońaltý ortalyǵynyń erekshe qajettilikteri bar balalardy ósirip otyrǵan otbasylarǵa tıgizetin kómegi kóp. Bul astanada jumys isteıtin osyndaı ortalyqtardyń tórtinshisi eken. Ortalyqtyń ashylý saltanatyna Nur-Sultan qalasynyń ákimi Altaı Kólginov qatysyp, erekshe balalarǵa qamqorlyq, olardyń ata-analaryn qoldaý qashanda nazarda bolatynyn atap ótti.
Ákimniń aıtýynsha, «Baqytty shańyraq» ortalyǵy múmkindigi shekteýli 600-den astam balany qamtıdy. Ortalyqtyń ereksheligi – múmkindigi shekteýli balalarǵa ǵana emes, olardyń analaryna da qajet kómek túrleri kórsetiledi. Munda erekshe balalardyń analaryna qaıta bilim alý, biliktiligin arttyrý kýrstarynan ótý, jumysqa ornalasý boıynsha járdem beriledi. Sol sııaqty psıhologııalyq kómek te kórsetiledi.
«Memleket basshysynyń tapsyrmasy boıynsha erekshe qajettilikteri bar balalarǵa jan-jaqty jaǵdaı jasaý máselesine erekshe kóńil bólinedi. Keıingi jyldary ońaltý ortalyqtarynyń jelisi aıtarlyqtaı artty. Osylaısha, 15-ten asa ortalyq ashyldy, olar 4 myńǵa jýyq múmkindigi shekteýli balany qamtyp otyr. Ońaltý ortalyqtary men kómek kórsetý ortalyqtary erekshe balalardyń ata-analary úshin aýadaı qajet. Sebebi mundaı ortalyqtar balanyń densaýlyǵyn jaqsartýǵa jáne olardy áleýmettendirýge kómektesedi. Máselen, osyǵan deıin «Asyl Mıras», «Orda», «Balam-Aı» ońaltý ortalyqtary, sol sııaqty №1 qalalyq balalar aýrýhanasy bazasynda «Qamqorlyq» ońaltý ortalyǵy ashyldy. Olar DSP,
aýtızm, daýn sındromy jáne júrek talmasy sekildi dıagnozy bar balalardy ońaltýmen aınalysady. Sondaı-aq biliktilikti arttyrý jáne jumysqa ornalastyrý máselesine arnalǵan ortalyqtar, belsendi uzaq ómir súrý ortalyǵy (Ardagerler úıi), áleýmettik ortalyqtar («Januıa» otbasy ınstıtýtyn qoldaý ortalyǵy), kórý qabileti buzylǵan balalarǵa arnalǵan mamandandyrylǵan balabaqsha (Saryarqa aýdany, Kenesary kóshesi 9/1) ashyldy», dedi A.Kólginov.
«Baqytty shańyraq» ortalyǵynyń ashylýyna Parlament Májilisiniń depýtattary Dınara Zákıeva men Iýlııa Kýchınskaıa da kelip, tilektestigin bildirdi.
