Aqtóbede kórikti jer kóp, al ınfraqurylym syn kótermeıdi

M.Lomonosov atyndaǵy qalalyq ortalyq kitaphananyń 28 myń kitap qory bar, onyń 8 200-i qazaq tilindegi ádebıetter, sońǵy jyldary balalar ádebıetimen tolyǵyp keledi. Kitaphananyń 1 600 turaqty oqyrmany úshin barlyq jaǵdaı jasalǵan, ásirese elektrondy oqý­lyqtar júıesi jaqsy damyǵan. О́ńir basshysy Ońdasyn Orazalın aldaǵy jyly Aqtóbede zamanaýı oblystyq kitaphana qurylysy bastalatynyn jetkizdi.

D.Abaev «Batys-2» shaǵyn aýdanynda salynyp jatqan múmkindigi shekteýli jandarǵa arnalǵan dene­shynyqtyrý-saýyqtyrý kesheniniń qurylys jumystarymen tanysty. Qurylysy byltyr bastalǵan keshen aldaǵy jyly aıaqtalmaqshy. Odan keıin mınıstr Visit Aktobe aqparattyq ortalyǵynyń jumysymen tanysyp, óńirdegi týrızmniń da­mý barysy jóninde oblystyq ká­sipkerlik basqarmasynyń basshysy Nurhan Tileýmuratovtyń esebin tyńdady. Qazirgi ýaqytta Baıǵanın aýdanyndaǵy Aqtolaǵaı jáne Aq­qum borly qyrattaryna týrıstik marshrýttar iske asyrylyp jatyr. Týrıster ejelgi teńiz orny bolǵan jerden kóterilgen shaǵyn kanon túrindegi bıiktikterdi tamashalaıdy. Tabıǵaty tamasha jer bolǵanymen elsizde ornalasqan. Sý júrgizý, elektr jelilerin tartý kerek. Degenmen ınfraqurylym júrgizýge baılanysty kedergiler bar. D.Abaevty Áıteke bı aýdanyndaǵy Han molasy marshrýty da qyzyqtyrdy. Bul tarıhı týrızmge suranyp turǵan oryn, tabıǵaty da tamasha – О́lkeıik ózeniniń quıylysy. Toqeteri, Aqtóbe oblysynda ishki týrızmdi damytýda servıstik qyzmet uıymdastyrý jaǵy aqsap jatyr. Qarapaıym tilmen aıtqanda, jol boıy tamaqtaný oryndary, dárethana, sýmen jabdyqtaý jáne týrıster qonatyn jaıly oryndar salynýy kerek. Osylaısha, toǵyz joldyń torabyndaǵy Aqtóbe oblysynda kásipkerliktiń damýy úshin eń aldymen joldardy jóndep, jol boıy servısin retke keltirý qajet.

Mınıstrdiń jumys sapary odan ári Qobda aýdanynda jalǵasty. Altyn Orda zamanynyń eskertkishi Asan Qaıǵynyń balasy Abat batyr jerlengen eski keseneniń ortaǵasyrlyq kúıdirilgen qysh kirpishteri túsip, kesene tozyp turǵanda, «Mádenı mura» memlekettik baǵdarlamasymen qaıta jóndeýden ótti. Abat-Baıtaq Álııa Moldaǵulovanyń týǵan aýyly Bulaqtan onsha qashyq emes. Álııa apamyzdyń aýy­lyna aıaldaǵan soń mınıstr «Álııa» patrıottyq tárbıe berý ortalyǵynyń dırektory Baǵdash Tópenova reseılik izdeý otrıadtary tapqan qazaqstandyq jaýyngerlerdiń derekterimen tanys­tyrdy.

Mınıstr «Alaqaı» qýyrshaq teatrynyń ǵımaratynda máde­nıet jáne sport salasynyń qyzmet­kerlerimen, qoǵamdyq uıym ókilde­rimen kezdesti. Sport salasynyń ardagerleri bu­qaralyq sportty damytý, Pa­rıj Olımpıadasyna daıyndyq, jat­tyqtyqtyrýshylar mektebin qa­lyptastyrý máselesin kóterdi. Sonyń ishinde sporttyq úıirmelerdi jan basyna qarjylandyrýǵa qatań baqylaý qajettigi týraly aıtyldy. О́ıtkeni keıbir jeke kásipkerler kez kelgen jerden oryn alyp, balalardy jattyqtyrý úshin qarjy alsa da, jumystyń sapasy joq, jalǵa alǵan ǵımarat jattyqtyrý úshin yńǵaıly emes, zaldary tar, jýynyp-sheshinetin bólmesi, jattyqtyrýshylary da joq. Kóptegen ata-ana tarapynan jan basyna qarjylandyrý jobasyna qarsylyq kóbeıgen. Kezdesýge qatysqandar sport mektepteriniń bazasyn nyǵaıtyp, mamandarmen qamtamasyz etýdi jáne balalardy kásibı mektepterde erte bastan daıar­laýdy júıeli túrde qolǵa alýdy tapsyrdy. Negizgi basymdyq Olım­pıadalyq sport túrlerine berilýi kerek.

Dáýren Abaev Aqtóbede ótip jatqan Baqytty bala – 2022 IV ha­lyqaralyq balalar vokal konkýr­sy­nyń qatysý­shylarymen júzdesip, jumys saparyn aıaqtady.

Aqtóbe oblysy