«Jeti aıdyń qorytyndysy boıynsha jalpy ishki ónimniń ósimi 3,3%-ke jetti. El ekonomıkasynyń ósýine negizinen naqty sektor úles qosyp otyr. Máselen, óńdeý ónerkásibi salasynda tamaq ónimderin óndirý shamamen 3%-ke, sýsyn óndirý 9%-ten astam ósti. Jeńil ónerkásipte ósim 5%-ten joǵary boldy. Hımııa ónerkásibinde 11%-ke jýyq, munaı óńdeýde 4%, mashına jasaý ónimderin shyǵarýda 8%-ke jýyq ósim tirkeldi», dedi Premer-Mınıstr Úkimettiń búgingi otyrysynda.
Sonymen birge eldegi metallýrgııa óndirisi 5%, qurylys salasynda 8,6% deńgeıinde ósim bar. 7,7 mln sharshy metr turǵyn úı paıdalanýǵa berildi. Qyzmet kórsetý salasy boıynsha saýda 6%-ke, kólik 5,5%-ke jáne baılanys salasy 6,5%-ten astam ósken.
«Jeti aıdyń qorytyndysynda Qaraǵandy men Soltústik Qazaqstan oblystarynda jáne Shymkent qalasynda barlyq kórsetkishter boıynsha oń dınamıka qalyptasqan.
Jaýapty memlekettik organdar men óńir ákimdikteri jumysty jandandyryp, maqsatty makroekonomıkalyq kórsetkishterdi qamtamasyz etýi kerek. О́sý dınamıkasyn saqtap turý úshin ekonomıkany odan ári ártaraptandyrý, ınvestısııalyq jobalardy iske asyryp, jumys oryndaryn qurýdy kúsheıtip, jalǵastyrý qajet», dedi Á. Smaıylov.
Oǵan qosa, shilde aıynyń qorytyndysy boıynsha eldegi jyldyq ınflıasııa 15% bolǵan.
«Máselen, ótken aptada monopolııaǵa qarsy agenttikke qanttyń qymbattaýy men tapshylyǵyna qatysy bolýy múmkin kompanııa qyzmetin tekserýge tapsyrma berdim. Bul problemanyń kóterilgenine biraz boldy. Sondyqtan mundaı jaǵdaıdy jaýapty organdar erterek anyqtap, aldyn alý kerek.
Inflıasııany tejeý úshin qajetti quraldar bar. Memlekettik organdar men ákimdikter olardy tıimdi paıdalanýy tıis.
Taǵy da nazar aýdaratyn jaǵdaı – óńirlerdegi deldaldyq shemalardy tekserý komıssııalarynyń jumysyn jandandyryp, áleýmettik mańyzy bar azyq-túlikke baǵa ústemesiniń 15% mólsherinde bolýyn erekshe baqylaýda ustaý kerek. Sondaı-aq ákimdikter aýyl sharýashylyǵy ónimderin forvardtyq satyp alý úshin kelisim-sharttardyń ýaqytyly jasalýyna da baqylaýdy kúsheıtýi kerek», dedi Úkimet basshysy.
