Jambyldyq polıseıler esirtkiniń eń aýyr túrleriniń biri sanalatyn geroın satýmen aınalysqan kúdiktini qolǵa túsirdi. Mamandardyń aıtýynsha, dál osy geroın adamdardy alǵash tutynǵannan-aq ózine táýeldi etip tastaıdy eken. Derekterge sensek, qolǵa túsken kúdikti oblys ortalyǵynda uzaq ýaqyt boıy geroın zatyn satýmen aınalysyp kelgen. Polıseılerdiń kúdiktini ustaý operasııasynyń beınejazbasy áleýmettik jelide tarap ketti.
Quzyrly organ qyzmetkerleri keltirgen málimetterge sensek, kúdiktiniń turǵylyqty jerine tintý jumystaryn júrgizý barysynda 10 gramm geroın zaty tárkilenipti.
«Jedel-izdestirý sharalary Jambyl oblysynyń polısııa departamenti esirtki qylmysyna qarsy is-qımyl basqarmasy qyzmetkerleriniń belsendiligimen júzege asqanyn aıta ketken lázim. Bul operasııa QR Ulttyq ulanynyń №5513 áskerı bóliminiń «Búrkit» arnaıy maqsattaǵy bólinisimen birlese uıymdastyrylǵan «Qarasora – 2022» respýblıkalyq is-sharasy aıasynda ótkizildi.
Ustalǵan azamat qazirgi kezde óz kinásin tolyq moıyndap, ýaqytsha ustaý ızolıatoryna qamaýǵa alyndy.
Qazirgi ýaqytta atalǵan derekke qatysty Qazaqstan Respýblıkasy Qylmystyq kodeksiniń 297-baby 3-bóligi boıynsha (Esirtki zattaryn ótkizý maqsatynda asa iri mólsherde zańsyz saqtaý) sotqa deıingi tergeý amaldary bastaldy. Búgingi kúni osy qylmysqa qatysy bar basqa da tulǵalardy anyqtaýǵa baǵyttalǵan birqatar tergeý jumysy júrgizilýde. Atalǵan bapqa sáıkes kúdikti 15 jylǵa deıingi merzimge bas bostandyǵynan aıyrylýy múmkin», deıdi Jambyl oblysynyń polısııa departamenti esirtki qylmysyna qarsy is-qımyl basqarmasynyń bastyǵy polısııa polkovnıgi Asqar Jumabekov.
