Kınostýdııa prezıdenti Aqan Sataevtyń aıtýynsha, qazirgi ýaqytta arnaıy komıssııa damý vektorlaryn, eńbekaqy tóleýdi qalyptastyrý prınsıpterin jáne uıymdastyrý qurylymyn anyqtaldy. Uıymnyń shtattyq quramy men sany qalyptastyryldy.
«Sizderdi jaqsy jańalyqpen qýantqym keledi. 1 qyrkúıekten bastap jalpy kınostýdııa boıynsha qyzmetkerlerdiń jalaqysy orta eseppen 30%-ǵa ósedi. Mádenıet mınıstrligi tarapynan, pıtchıngte óz jobalaryn qorǵaǵan avtorlar tarapynan úlken qoldaý kórsetildi. Biz jalaqyny kóterdik jáne osymen shektelmeımiz dep úmittenemin. Osy oraıda stýdııanyń jetistigi árqaısymyzǵa baılanysty ekenin atap ótkim keledi. Sondyqtan sizderdi ári qaraı da jaýapty bolýǵa jáne jaqsy jumys isteýge shaqyramyn», dedi A.Sataev.
Kezdesý barysynda kınostýdııanyń ssenarlyq-redaksııalyq alqa jumysy barynsha qolǵa alynatyny aıtyldy.
Uıymdastyrý qurylymyn reformalaýda basty nazar ssenarlyq-redaksııalyq alqanyń jumysyna jáne otandyq kórermender talap etetin sapaly fılmder shyǵarýǵa aýdarylady. Kınostýdııaǵa arnalǵan klassıkalyq bólimshelerden basqa qurylymǵa ǵylymı-zertteý kınolaboratorııasy, kınostýdııanyń sıfrlyq transformasııasyna jaýap beretin baǵdarlamalyq-tehnıkalyq basqarý jáne damý bólimi engiziledi. Sondaı-aq, marketıng bólimi men baspasóz qyzmetiniń jumysyn kúsheıtý josparlanýda.
Memlekettik baǵdarlamany iske asyrý maqsatynda «Qazaqanımasııa» shyǵarmashylyq birlestigi qurylady. Búginde kınostýdııa «Ulttyq kınony qoldaý memlekettik ortalyǵy» júrgizgen pıtchıng nátıjeleri boıynsha, sondaı-aq quqyǵy «Qazaqfılmge» tıesili klassıkalyq qazaqstandyq kıno qoryn restavrasııalaý baǵdarlamasyn iske qosý boıynsha jumysqa kiristi.
Kınostýdııada 2021 jyly bastalǵan belsendi jańǵyrtý baǵdarlamasy jalǵasýda. Injenerlik jeliler men ǵımarattarǵa tehnıkalyq qaıta jaraqtandyrý, kúrdeli jóndeý júrgizý, sondaı-aq túsirilim pavılondaryn salý kózdeledi. Atalǵan jumystar kınostýdııany jańa halyqaralyq deńgeıge shyǵarýǵa jáne Ortalyq Azııa óńirinde jetekshi orynǵa shyǵýǵa múmkindik bermek.
Jańǵyrtý aıasynda úsh negizgi ǵımaratta: plenkaly-zerthanalyq keshen, 2 pavılondy blok pen ton-stýdııada jumystar bastaldy. Sondaı-aq, taǵy da qosymsha úsh ǵımarat salý josparlanýda. Bul - eki pavılondy jáne bir úlken qoıma blogy. Sondaı-aq, jazǵy kınoteatr men murajaı salý mindeti de qoıylǵan. Kınostýdııanyń barlyq ınfraqurylymy kezeń-kezeńimen jańartylady.
