«Kóbi «nege alyp tastaý kerek, basqa oblystarǵa kóshireıik» dedi. Biraq ókinishke qaraı, bul ádisterdi ǵylymı qoǵamdastyq tıimsiz jáne ruqsat etilmeıtin dep tanydy. Sebebi kóshý áreketi kezinde kıikterdiń ólý qaýpi joǵary jáne olardyń burynǵy tarıhı mekendegen ornyna qaıta oralý yqtımaldyǵy joǵary. Sondyqtan qazir bul másele qabyldanbady», dedi Serikqalı Brekeshev.
Sonymen qatar qasqyr sanyn kóbeıtý týraly usynystar da boldy. Biraq mınıstrdiń aıtýynsha, bul nusqanyń ózi máseleni birden sheshpeıdi.
«Qasqyr negizinen álsiregen, aýrý maldardy popýlıasııadan shyǵarady. Ol ormannyń ámirshisi bolyp sanalady. Kerisinshe, bul tek halyq sanyn jaqsartýǵa kómektesedi, tabyn saý bolady», dep qosty mınıstr.
Onyń aıtýynsha, qazir Aýyl sharýashylyǵy mınıstrligimen jáne Qazaqstannyń aýyl sharýashylyǵyn saqtandyrý qaýymdastyǵymen birlese otyryp, kıikterden jaıylymdar men egistikterge zaqym kelgen jaǵdaıda aýyl sharýashylyǵyna keltirilgen zalaldy jáne yqtımal aýyl sharýashylyǵyn saqtandyrýdy baǵalaý ádistemesin ázirleý máselesi qarastyrylyp jatyr.
«Búginde Batys Qazaqstan oblysynyń aýylsharýashylyq taýar óndirýshileriniń suraqtary men shaǵymdary ózdiginen joǵalyp ketti. О́ıtkeni aqbókenniń qonys aýdaratyn janýar ekenin eskersek, olar osy aýmaqtan ózderiniń kóshi-qon joldaryn kesip ótip úlgergen. Sondyqtan qazir aýyl sharýashylyǵy plantasııalaryna zııan keltirý máselesi turmaıdy», dedi mınıstr.
Soǵan qaramastan Ekologııa mınıstrligi Ǵylym mınıstrligimen birlese kúzde 500 aqbókendi atpastan, saraptamadan ótkizbek.
«Sonymen birge kelesi jyly sporttyq jáne áýesqoılyq ańshylyqty uıymdastyrý jáne ótkizý máselesi qarastyrylyp jatyr. Bul aqyly ańshylyq bolady. Negizinde aqbókenniń Qyzyl kitapqa engen janýar emes ekenin joǵaryda aıtqan edik. Bizde 2023 jyldyń 1 qańtaryna deıin ań aýlaýǵa tyıym salynǵan. Qazir bul máseleler qarastyrylyp, jaqyn arada, qazan aıynyń sońyna deıin naqty sheshimin tabamyz», dedi S.Brekeshev.
Eske sala keteıik, 14 shildede Úkimettiń keńeıtilgen otyrysynda ekologııa mınıstri Serikqalı Brekeshevke kıikterdi atý týraly sheshimi úshin Prezıdentten sógis aldy.
«80 myń aqbókendi tabıǵı landshafttan shyǵarý, ıaǵnı qyrý jóninde usynys jasalyp jatyr. Biraq basqa ádister bar, sarapshylarmen keńesińiz. Bul eń ekstremaldy degen sharalar. Osyndaı iske barý qajet bolýy múmkin ekenin joqqa shyǵarmaımyn. Biraq bul - shekten shyqqan shara», dedi Memleket basshysy sol kezde.
