Erler arasyndaǵy jarysta 12 komanda óner kórsetedi. Olar – AQSh, Kanada, Chehııa, Ulybrıtanııa, Majarstan, Japonııa, Ońtústik Koreıa, Latvııa, Slovakııa, Shvesııa, Ýkraına jáne Qazaqstan quramalary. Birinshi kezeńde olar alty-altydan eki topqa bólinip, ózara sheberlik baıqasady. Sonyń nátıjesi boıynsha aldyńǵy eki oryndy ıelengen tórt ujym pleı-offqa joldama alyp, júldeli oryndar úshin talasady.
Shaıbaly hokkeıden ótetin álem chempıonattarynda únemi kósh sońynda qalyp qoısaq ta, Jer-jahannyń stýdentteri bas qosqan jarystarda jerlesterimiz jaqsy óner kórsetip júr. Máselen, 1993 jyldan beri Dúnıejúzilik Ýnıversıadanyń jalaýy 14 márte jelbiredi. Sol básekelerdiń beseýinde Qazaqstannyń hokkeıshileri jeńis tuǵyryna kóterildi. 1993 jyly Zakopanede Reseıge ǵana ese jiberip, kúmis medaldi ıelendik. 1995 jyly Hakada bas júldeni oljaladyq. Ol týrnırdiń fınalynda Chehııany san soqtyrdyq. Al 2013, 2015 jáne 2017 jyldary kúmis medaldy enshiledik. Ispanııa men Slovakııa birlesip ótkizgen Ýnıversıadada Kanadadan jeńilsek, Trento men Almatyda reseılikterge jol berdik. 2019 jyly Krasnoıarskide shymyldyǵy túrilgen baıraqty básekede aıdyn ıeleriniń asyǵy alshysynan tússe, kúmis pen qola medaldy slovaktar men kanadalyqtar ıelendi. Mine, osy derekterdiń ózi-aq shaıbaly hokkeıdi serik etken otandyq stýdentterimizdiń áleýeti qanshalyqty joǵary ekenin ańǵartyp tur. Olaı bolsa, jerlesterimizden Leık-Plesıdte de jeńister kútemiz.
Áıelder arasyndaǵy jarys 2009 jyldan beri uıymdastyrylyp keledi. Sol aralyqta bas júldeniń úsheýin Kanada jeńip alsa, úsheýinde Reseı hokkeıshileriniń baǵy jandy. Kelesi jyly ótetin jarysta Kanada, Chehııa, Ulybrıtanııa, Japonııa, Slovakııa jáne SShA quramalary aınalma júıe boıynsha oınaıdy. Bul básekede de tórt úzdik komanda pleı-offta kúsh synasý múmkindigine ıe bolady.
