US open týrnıriniń 141 jyldyq tarıhy bar. Alǵashqy birinshilik sonaý 1881 jyly uıymdastyrylǵan bolatyn. Ol kezderi erler saıysynda Rıchard Sırsqa teń keler eshkim tabylmady. Boston qalasynyń týmasy qatarynan jeti jarysta bas júldeni qanjyǵasyna baılady. HH ǵasyr tabaldyryqtan attaǵan tusta Ýılıam Larnedtiń tasy órge domalady. Nıý-Djersıde dúnıege kelgen sańlaq jeti dodada dara shyqty. Jıyrmasynshy jyldary Bıll Tıldenniń qarqyny óte kúshti boldy. Fıladelfııanyń tól týmasy Larnedtiń jetistigin qaıtalady. 1926 jyly atalǵan jarysta alǵash ret sheteldik oıynshy jeńis toıyn toılady. Ol Fransııanyń aty ańyzǵa aınalǵan azamaty Rene Lakost edi. Kelesi maýsymda ol óziniń kórsetkishin qaıtalasa, 1928 jyly dál sol memlekettiń ókili Anrı Koshe qarsylas shaq keltirmedi.
О́tken ǵasyrdyń sekseninshi jyldary AQSh-tyń qos maqtanyshy – Djımmı Konnors pen Djon Makınroıdyń mereıleri ústem boldy. Alǵashqysy – bes, ekinshisi – tórt ret teńdessiz dep tanyldy. Ǵasyrlar toǵysynda Amerıkada turyp jatqan grekııalyq Pıt Sampras aldyna jan salmady. Ol bes jarysta top jardy. 2004-2008 jyldary shveısarııalyq Rodjer Federer qatarynan bes týrnırde qarsylas shydatpady. Byltyrǵy dodada bul kúnderi álemdik reıtıngte kósh bastap turǵan reseılik Danııl Medvedev jeńiske jetti. Fınalda ol Serbııanyń sańlaǵy Novak Djokovıchti san soqtyrdy.
Áıelder arasyndaǵy básekelerde HH ǵasyrdyń basynda norvegııalyq Molla Bıýrshtedtiń baq juldyzy jarqyraı jandy. Skandınavııa túbeginiń tennısshisi segiz jarysta aldyna jan salmady. Kóp uzamaı amerıkalyq Helen Ýıllz-Mýdı jeti jeńispen toqtady. Onyń otandasy Krıs Evert 1975-1982 jyldar aralyǵynda alty dodada dara shyqty. HHI ǵasyrda Serena Ýılıams shashasyna shań juqtyrmady. Nıý-Iorktegi básekede AQSh-tyń áıgili oıynshysynyń alty márte mereıi ústem boldy. Byltyr ótken jarysta Emma Radýkanýdyń tegeýrinine eshkim shydaı almady. 18 jastaǵy Ulybrıtanııa ókili aqtyq saıysta óziniń qurbysy, kanadalyq Leıla Fernandesten basym tústi.
Qazaqstannyń tennısshileri arasynan AQSh-tyń ashyq birinshiliginde eń táýir kórsetkishke Iýlııa Pýtınseva qol jetkizdi. Osydan eki jyl buryn ol shırek fınalǵa deıin jetti. 2016 jyly Iаroslava Shvedova tórtinshi kezeńde súrindi. Al 2013-2020 jyldar aralyǵynda Mıhaıl Kýkýshkın bes ret úshinshi aınalymnan asa almady. 2014 jyly Zarına Dıas, 2019 jyly Aleksandr Býblık jáne 2021 jyly Elena Rybakına dál sol mejege kelip toqtady. Iá, jekelegen saıysta jolymyz ońǵarylmaǵanymen, juptyq básekede baǵymyzdyń janǵany jankúıerlerdiń jadynda. Sonaý 2010 jyly amerıkalyq Vanıa Kıngpen jup quraǵan Shvedova US open dodasynda bas júldeni oljalady. Bul qazaqstandyq tennısshilerdiń «Úlken dýlyǵa» sanatyndaǵy týrnırlerdegi alǵashqy jeńisi edi.
«Úlken dýlyǵa» sanatyna engen jarystardyń júlde qory da mol bolatyny málim. AQSh-tyń ashyq birinshiligine qatysqan oıynshylardyń materıaldyq jaǵdaılaryn jaqsartýǵa múmkindikteri zor. Bıyl atalǵan dodanyń júlde qory 60 mıllıon dollardy qurap otyr. Tarqatyp aıtsaq, erler men áıelder arasyndaǵy básekede bas júldeni oljalaǵan oıynshy 2,6 mıllıon dollardy ıemdenedi. Aqtyq synda jeńilgenderge sol somanyń teń jartysy beriledi. Jartylaı fınalǵa deıin jetkenderdiń esepshotyna
705 000 aýdarylsa, shırek fınalǵa shyqqandar
445 000-dy enshileıdi. Tórtinshi kezeńde oınaǵandar 278 000-dy ıelense, úshinshi aınalymda súringender 188 000-ǵa ıelik etedi. Ekinshi kezeńde utylǵandar 121 000-dy qaltaǵa basady. Tipti, tusaýkeser kezdesýinde jeńilistiń kermek dámin tatqandar da qurqol qaıtpaıdy. Osy birinshilikke qatysqanyńyz úshin ǵana 80 000 dollardy qaltańyzǵa basasyz. Mine, sol sebepti de Nıý-Iorktegi týrnırde baq synaýǵa barlyq tennısshi nıet etip otyr.
