Mamandardyń qorytyndysyna sáıkes, Úlken Shabaqty kóline adamdardyń áser etý belgileri tabylǵan joq. Kóldegi balyqtyń qyrylýyna kóldiń túbinen tabıǵı gazdyń shyǵýy nemese sý qoımasynyń maýsymdyq gúldenýi sebep bolýy múmkin.
Eske sala ketsek, 2022 jyldyń 12 tamyzynda Úlken Shabaqty kólinde balyqtyń qyrylý derekteri anyqtaldy. Ulttyq park qyzmetkerleri shamamen 250 keli ólgen balyqty jınap, kádege jaratty. Bul negizinen aq balyq boldy.
«2022 jylǵy 14 tamyzda alynǵan synamalarda tuz quramy, rN mólsheri, ftorıd, hımııalyq ottegi kólemi joǵary bolǵany anyqtaldy. Balyq ólgen tusta jáne solǵa qaraı 300 metr aýmaqta sýdyń rN quramy 9,06-9,08 boldy. Shekti mólsher 6-9 deńgeıinde bolýy tıis. Balyqtardyń óligi tabylǵan jerde hımııalyq ottegi kólemi 33-38 mgO2/l ekeni anyqtaldy, qalypty jaǵdaıda ol 30 mgO2/l shamasynda bolǵany shart. Bıohımııalyq ottegi de shekti mólsherden asyp tústi. Ftorıd quramy 7,31-8,52 mg/l, onyń qalypty normasy - 1,5 mg/l. Alaıda bul kórsetkishter tabıǵı sıpatqa ıe, bul sýqoıma lastandy degendi bildirmeıdi. Sý tuzdylyǵynyń joǵarylaýy da tabıǵı qubylys. Ammonıı azotynyń joǵarylaýy jaz maýsymynda ósimdikterdiń gúldeýimen baılanysty bolýy múmkin. Balyq qyrylǵan aımaqta antropogendik áser anyqtalmady. Bul aýmaqta ónerkásiptik kásiporyndar men eldi mekender joq», dep túsindirdi oblystyq Ekologııa departamentiniń zerthanalyq-analıtıkalyq baqylaý bóliminiń bastyǵy Maksım Shlymov.
Qazir balyq óliminiń jańa faktileri anyqtalǵan joq.
Aıta ketsek, qosymsha zertteýler qyrkúıek aıynda júrgiziledi.
