Bul kisi muǵalimder otbasynda tárbıelenip ósti. Ákesi Aryn О́teshov, anasy Jamal Majenova da kenshiler astanasyndaǵy Jambyl atyndaǵy №7 orta mektepte kóp jyl bala oqytyp, ustazdyq etken. Sol sebepti bolar, mektepti bitirgen Náılıa syndy órimdeı jastyń aldynda bir ǵana jol boldy. Ol – ata-anasynyń izin basyp, ustazdyqtyń jaýapkershilikke toly jolyna túsýdi maqsat etti.
Osy armandy qanat qylyp baılaǵan jas Náılıa 1969 jyly Ebineı Bóketov atyndaǵy Qaraǵandy memlekettik ýnıversıtetiniń fılologııa fakýltetine kelip baǵyn synaǵan. Mektepte alǵan tereń bilim talapty jasty synaqtyń nebir aýyr kezeńderinen abyroımen alyp shyqty.
Qolyna dıplom alǵan soń, muǵalimdik eńbek jolyn 1973 jyly Abaı qalasyndaǵy №12 orta mektepte bastaǵan. Odan keıin Qaraǵandy qalasyndaǵy №15 mektepte jáne medısına-tehnıkalyq kolledjde orys tili jáne orys ádebıeti pánderi boıynsha sabaq berip, jemisti eńbek jolyn jalǵastyrdy.
Uzaq jyldar boıy jıǵan baı tájirıbesi bar ustazdyń keıingi jas mamandarǵa aıtar keńesi qarapaıymdylyǵymen jáne shynaıylyǵymen tánti etedi. «Muǵalimdikti tańdaǵan jastar óz mamandyǵyn, óz pánin súıýi kerek. Mamandyqpen maqtana bilýdiń ózi mártebe. Ustaz úzdiksiz izdeniste bolsa, kóp oqysa, shyǵarmashylyqqa umtylsa, talapty oqýshyny tárbıeleýdi maqsat qylsa, ondaı pedagog mamannyń bolashaqtaǵy abyroı-bedeli zor bolady», dep oı tujyrady Náılıa Arynqyzy.
Ulaǵatty ustazdyń «Pedagog mártebesi týraly» Zańǵa degen kózqarasy da baıyptylyǵymen erekshelenedi. «Máni tereń qujat, deıdi ol. – Shyndap kelgende, ustazdar quqyǵynyń aýqymy keńeıdi. Júktemesi azaıyp, qosymsha jumystardan bosatyldy. О́kinishke qaraı, munyń bári pedagogterdiń óz jumysymen tikeleı aınalysýyna barynsha kedergi bolyp kelgen edi. Al olardyń eńbekaqysynyń kóbeıgenin áleýmettik ádildik dep baǵalaýǵa bolady. Uly ustaz Ybyraı Altynsarınniń ózi «Bizge jaqsy muǵalim bárinen qymbat. О́ıtkeni muǵalim – mekteptiń júregi», degen joq pa!».
Tájirıbeli pedagog Náılıa Arynqyzy joǵary oqý oryndary men mektepter arasyndaǵy baılanys nyǵaıtyla tússe eken dep tileıdi. «Stýdentterdiń mektepte óndiristik praktıkadan ótýine kóńil kóbirek bólinse deımin. Bolashaq mamandar mamandyqqa qoıylatyn talaptarmen is júzinde tanyssa, nur ústine nur bolar edi», deıdi ustaz.
Búginde orys tiline degen suranystyń azaımaǵanyn aıtady Náılıa Arynqyzy. Pedagogtiń pikirinshe, orys tili – bıznestiń tili. Qazirgi qoǵamda orys tilin bilý qajettilik bolyp tur dep sanaıdy ol. «Bul tilge degen suranys pandemııa kezinde joǵarylady, – deıdi pedagog. – Nege deseńiz, kásipkerlerdiń kóbi saýda-sattyqty ınternet arqyly jasady. Jalpy, ǵalamtorda orys tilinde óte sapaly ǵylymı maqalalardyń kóp ekenin aıta ketkim keledi. Sol sebepten bolsa kerek, bul til ýıkıpedııada qyzǵylyqty jáne paıdaly materıaldar boıynsha jetinshi orynda tur».
Eńbek ótiline jarty ǵasyr bolǵan Náılıa Arynqyzy qaladaǵy №15 orta mektepte orys tili jáne orys ádebıeti pánderinen sabaq beredi. Qosymsha medısına-tehnıkalyq kolledjde de eńbek etedi. Jastardan kalyspaı, túrli saıystarǵa, semınarlarǵa qatysady. Jumysynda jańa tehnologııalardy qoldanyp, sabaqtaryn qyzyqty ótkizýge bar kúshin salady. «Mamandyǵymdy sheksiz súıemin. Sodan da bolar, jumysyma kúlip baryp, kúlip qaıtamyn», deıdi ulaǵatty ustaz aǵynan jarylyp.
Saıyp kelgende, munyń bári óziniń tańdap alǵan mamandyǵyna degen sheksiz berilgendiktiń shynaıy úlgisi ǵoı. Jastar dál osyndaı parasatty pedagog, ónegeli tálimgerlerdiń ómirsheń ustanymdarynan úlgi alsa deısiz!
QARAǴANDY
