Bıylǵy jyldy «Intergaz Ortalyq Azııa» AQ «Qaýipsiz eńbek – 2022» bastamasy aıasynda ótkizýde. Ataýly jyl sheńberinde ótkiziletin is-sharalar aksıonerlik qoǵamda eńbek qaýipsizdigine jáne eńbekti qorǵaýǵa aıryqsha basymdyq berilgenin aıǵaqtap tur. Qyzmetkerlerdiń ómiri men densaýlyǵyna beıjaı qaramaı, óndiristik jaraqattanýdyń jáne kásibı aýrýlardyń aldyn alý baǵytyndaǵy kórsetkishterdi joǵarylatatyn «Qaýipsiz eńbek – 2022» is-sharasyn qolǵa alǵan kompanııa basshylyǵynyń bastamasy jan-jaqty qoldaý taýyp otyr.
Osy jyldyń 24 tamyzynda «Intergaz Ortalyq Azııa» AQ paıdalanatyn «Qaraózek» kompressorlyq stansasynyń bazasynda qaýipsiz eńbek jyly aıasynda shuǵyl medısınalyq kómek kórsetý jáne boljamdy zardap shegýshilerdi shuǵyl evakýasııalaý boıynsha oqý-jattyǵý sabaǵy ótti. Gaz qubyryndaǵy apattyq jaǵdaıdy oqshaýlaý jáne joıý ádisterin kórsetetin oqý-jattyǵý sabaǵyna «Intergaz Ortalyq Azııa» AQ Qyzylorda fılıalynyń óndiristik blogy, jedel medısınalyq kómek kórsetý mamandary, «Aqberen» avarııalyq-qutqarý qyzmetiniń qyzmetkerleri, «Járdem óndiristik medısına» JShS men obektini kúzetetin merdigerlik uıymdardyń ókilderi qatysty.
Oqý-jattyǵý sabaqtarynyń ssenarııi boıynsha kompressorlyq stansada órt bolyp, shyǵý shleıfi jaryldy. Rasııa arqyly túsken habarlamalarǵa sáıkes jattyǵýǵa qatysqandar krandardy aýystyra otyryp, jumys istep turǵan gaz aıdaý agregattaryn avtomatty túrde toqtatýǵa kiristi. Apatty joıýǵa gaz aıdaý stansasynyń basshysy jetekshilik etti. Mamandar oqystan bolǵan oqıǵada abyrjymaı, kompressorlyq stansadaǵylardy evakýasııalaýdy, órtti oqshaýlaý men joıýdy qolǵa aldy.
Aýysym ınjeneri órt sóndirý jáne qutqarý qyzmetteriniń mamandary jetkenin habarlady. О́rt sóndirýshiler sanaýly sekýnd ishinde shlangty sý gıdranttaryna jalǵap, jalynnyń jolyn kesýge asyqty. Kóp uzamaı jelilik qubyr júrgizýshisinen apatty jaǵdaıdaǵy alǵashqy mindet oıdaǵydaı oryndalǵany jóninde habarlama kelip tústi.
Osy sát rasııa arqyly eki adamnyń zardap shekkeni jaıly habarlandy. Onyń biri qoly men aıaǵy synyp, kóp qan joǵaltsa, ekinshisiniń júrek soǵýy nasharlap, esinen tanǵan. Medısınalyq qyzmetkerler brıgadasy jedel túrde barlyq qajetti reanımasııalyq sharany qolǵa alyp, aldymen qandy toqtatty. Ekinshi top júrek soǵysy toqtaǵan jumysshynyń esin jıǵyzý áreketine kiristi.
Der kezinde kórsetilgen alǵashqy dárigerlik kómektiń nátıjesinde zardap shekkender aman qalyp, shaqyrý boıynsha kelgen «Jedel járdem» kóligine jetkizildi. Sálden soń órt sóndirý komandasynyń qaraýyl basshysy aýysym ınjenerine jalynnyń tolyq aýyzdyqtalǵanyn málimdedi.
Oqý-jattyǵý sabaǵy aıasynda jasalǵan jumystardy «QazaqGaz» UK» AQ jáne onyń enshiles kompanııalarynyń basshylary baqylady.
«Intergaz Ortalyq Azııa» AQ tehnıkalyq dırektory Áýezhan Ýrombaevtyń aıtýynsha, oqý-jattyǵý sabaqtarynyń negizgi maqsaty – barlyq jumyldyrylǵan toptyń daıyndyǵyn, olardyń apattardy oqshaýlaý men joıýdaǵy ózara is-qımylyn baǵalaý. Ol jattyǵýǵa qatysqan barlyq qyzmet mamany berilgen tapsyrmalardy kásibı deńgeıde atqarǵanyn atap ótti.
– Kompanııa jarııalaǵan «Qaýipsiz eńbek – 2022» is-sharasy aıasyndaǵy búgingi jattyǵýda barlyq qurylym ókiliniń birlesken qımylynyń arqasynda apattyń aýyzdyqtalǵanyna kýá boldyq. Merdiger kompanııalar ókilderimen qatar, «Intergaz Ortalyq Azııa» AQ mamandary da qoıylǵan mindetterdi oryndaýda, teorııalyq bilimdi tájirıbede qoldanýda naqty ári úılesimdi áreket etti. Mundaı jattyǵýlardyń biz úshin mańyzy zor. Osylaısha, san márte pysyqtalyp, daǵdyǵa aınalǵan is-áreketter kompanııaǵa turǵyndarǵa tabıǵı gazdy úzdiksiz jáne qaýipsiz tasymaldaýdy júzege asyrýǵa múmkindik beredi, – dedi Áýezhan Ýrombaev.
«Intergaz Ortalyq Azııa» AQ úshin qaýipsizdik máselesi óte mańyzdy.
Kompanııanyń Shymkent qalasyndaǵy Oqý-kýrstyq kombınatynda mamandar arnaıy oqytylady. Olardyń kez kelgen jaǵdaıda apattyń jolyn kesetin tehnıkalary da saı. Kompanııa basshylyǵy sheberlikti shyńdaıtyn osyndaı jattyǵýlardyń nátıjesinde sońǵy jyldary apatty jaǵdaılar tirkelmegenin aıtyp otyr.
Jattyǵý ótken «Qaraózek» kompressorly stansasynda gaz qysymyn kóteretin 3 agregat, elektr stansasy bar. Olardyń jumysyn úılestirip, apattyń aldyn alý, oqys oqıǵa bola qalǵan jaǵdaıda jolyn kesý mamandardyń biliktiligine tikeleı baılanysty. «Intergaz Ortalyq Azııa» AQ «Qyzylorda» MGQB «Qaraózek» KS bastyǵy Keńes Embergenov jattyǵýda kásibı mamandarmen qatar, arnaıy daıyndyqtan ótken kompanııa ókilderi de úzdik kórsetkishke qol jetkizgenin aıtty.
– Kompressorlyq stansa toqtaýsyz jumys isteýi kerek. Mundaǵy jumys vahtalyq ádiske negizdelgen. Jazǵy kúnderi mundaǵy 3 qondyrǵynyń bireýi jumys istep, qalǵandary rezervte turady. Búgingi jattyǵý ssenarııi boıynsha qysym kóteretin tustan órt shyǵyp, ony toqtatýǵa túrli qyzmet mamandary jumyldyryldy. Bul rette ózimizdiń paramedıkter qyzmetin erekshe atap ótken jón. О́z mamandarymyzdyń osyndaı oqys oqıǵalarǵa daıyndyǵyn baǵalaýǵa arnalǵan jattyǵý nátıjesi kóńilimizden shyqty, – dedi stansa bastyǵy.
Jattyǵý aıasynda alǵashqy tapsyrmany múltiksiz oryndaǵan mamandar ekinshi tapsyrmaǵa sáıkes boljamdy apat saldaryn joıýǵa kirisip ketti. Jarty kúnge sozylǵan is-shara nátıjesinde oǵan qatysqan barlyq qyzmet ókiliniń jumysy joǵary baǵalandy.
QYZYLORDA
