Qalanyń 60-qa jýyq jumys berýshisi túrli baǵyttar boıynsha 1700-ge jýyq bos jumys ornyn usyndy, onyń ishinde «ROYAL CARS ASTANA» JShS, «Hilton Astana» qonaq úıi, «ARENA S» JShS jáne ózgeleri sııaqty elordanyń jetekshi kásiporyndary bar. Sondaı-aq, 9 jumys berýshi probasııa qyzmetiniń esebinde turǵan jáne bas bostandyǵynan aıyrý oryndarynan bosatylǵan adamdardy jumysqa ornalastyrý úshin 170-ten astam bos jumys ornyn usyndy.
Jármeńkeniń alǵashqy saǵatynda 100-den astam adam keldi. Elorda turǵyny Raısa Baratova aspazshy jumysyn izdedi. Munda jumys berýshilermen tikeleı sóılesip, birden birneshe uıymǵa suhbattasýǵa shaqyrý aldy.
«Qazir jumyssyzdardy jumyspen qamtý ortalyǵynda tirkelip turmyn. Chatqa habarlama keldi. Mundaı aksııalardyń bolǵany jaqsy. Shamamen 5-6 bos oryndy kórdim. Ázirge aspazshy jumysyn izdep júrmin. Usynylǵan jalaqy mólsheri oıdaǵydaı, 300 myńǵa deıin barady», deıdi Raısa Baratova.
Jármeńkege Nur-Sultan qalasy Prokýratýrasynyń, Jumyspen qamtý jáne áleýmettik qorǵaý basqarmasynyń, Ádilet departamentiniń jáne qylmystyq-atqarý júıesi departamentiniń ókilderi qatysty.
«Biz aqpan aıynan beri bas-aıaǵy 49 jármeńke ótkizdik. Azamattardyń jekelegen sanattary úshin shaǵyn jármeńkeler ótkizýge tyrysamyz. Bizde qala ákimdiginiń qaýlysy bar, onda múgedektigi bar adamdar úshin, bas bostandyǵynan aıyrý oryndarynan bosatylǵandar úshin, probasııa qyzmetinde esepte turǵan adamdar úshin jumys oryndaryna kvota belgilengen. Olardy kvota aıasynda jumysqa ornalastyrýǵa tyrysamyz», dedi Nur-Sultan qalasy ákimdiginiń jumyspen qamtý ortalyǵynyń orynbasary Talǵat Esimov.
Jumys izdeýshiler ózderin qyzyqtyratyn salada bos jumys oryndaryn izdep qana qoımaı, jumys berýshilermen tikeleı sóılesýge múmkindik berildi. Sondaı-aq azamattarǵa Jumyspen qamtý ortalyǵynyń mamandarynan ózderin qyzyqtyratyn máseleler boıynsha keńester aıtyldy.
Aıta keteıik, jyl sońyna deıin Nur-Sultanda 28 myń jańa jumys orny ashylady. Bos oryndar jármeńkesiniń maqsaty – azamattardy bos jumys oryndaryna ornalastyrý. «Jastar» saraıynda ótkizilgen jalpy qalalyq jármeńkege 400-ge jýyq jumys izdeýshi qatysty. Halyqty jumyspen qamtý ortalyǵynyń málimetinshe, jyl sońyna deıin osyǵan uqsas 7 is-shara ótedi.
