Qalanyń ártúrli aýdandarynda belgili otandyq qaıratkerlerge arnalǵan jańa mýraldar ashyldy. Máselen, qoǵam jáne memleket qaıratkeri, «Alash» ulttyq-demokratııalyq partııasynyń kóshbasshysy, ǵalym jáne pýblısıst Álıhan Bókeıhanulynyń beınesi Táýelsizdik dańǵylynda, dálirek aıtsaq, Almaty aýdany, Táýelsizdik dańǵyly, 38 úıdiń qabyrǵasynda beınelendi.
Jeltoqsan kóshesi, 27 mekenjaıyndaǵy úıdiń qabyrǵasyna Uly Otan soǵysy jyldarynda erligimen, batyrlyǵymen, mergendigimen este qalǵan Álııa Moldaǵulovanyń qurmetine mýral paıda boldy.
Roza Baǵlanovanyń 100 jyldyq mereıtoıyna oraı M.Jumabaev kóshesindegi úıdiń qasbetine ánshige arnalǵan mýral salyndy.
J.Jırentaev kóshesi, 2 mekenjaıyndaǵy úıdiń qasbetine beligil kompozıtor, ánuran avtory Shámshi Qaldaıaqovtyń qurmetine mýral salyndy.
Qaramende bı Shaqauly kóshesi, 1 mekenjaıyndaǵy úıdiń qasbetine halyq ártisi, aty ańyzǵa aınalǵan opera ánshisi Ermek Serkebaevtyń beınesi beınelengen.
Sondaı-aq Beıbitshilik kóshesi, 62 – «Kún sónbesin», Baraev kóshesi, 17 – «Jeti qazyna», Beıbitshilik kóshesi, 52 – «Syrmaq», Mámbetov kóshesi, 30 – «Qala turǵyndary», Saryarqa dańǵyly, 42 – «Búgin anańa habarlastyń ba?», Ǵ. Músirepov kóshesi, 7 – «Pease» jáne basqa da kóshelerde jańa sýretter paıda boldy.
«Biz qalamyzda kóshe ónerin ártaraptandyrý úshin jumys istep jatyrmyz. Mýraldar qalany jandy, qyzyqty jáne kóńildi etedi. Mýral – ashyq aspan astyndaǵy galereıa. Bul óte mańyzdy. Negizinen ónerde jáne shyǵarmashylyqta óz izin qaldyrǵan batyldyq pen erlik kórsetken tanymal qaıratkerlerimizge arnaımyz. О́skeleń urpaq, jastar batyrlarymyzdy bilýi jáne qurmetteýi kerek. Sondaı-aq, josparymyzda ǵylymǵa ólsheýsiz úles qosqan Salyq Zımanovtyń, aǵartýshy ustaz Ybyraı Altynsarınniń, ǵalym Ahmet Baıtursynovtyń, geolog-ǵalym Qanysh Sátbaevtyń, jazýshy Ábish Kekilbaevtyń, ánshi ári kompozıtor Batyrhan Shúkenovtiń, mánerlep syrǵanaýshy Denıs Tenniń jáne t.b. qurmetine muraldy turǵyzý josparda bar», dedi elorda ákimdigi ýrbanıstıka ortalyǵynyń basshysy Elnar Bazyken.
