Astana Opera halyqaralyq opera akademııasynyń kórkemdik jetekshisi, Qazaqstannyń eńbek sińirgen qaıratkeri Tımýr Ýrmancheev óz sózinde óner jolyn endi bastaǵan opera ánshileri úshin osyndaı baıqaýlarǵa qatysý olardyń vokaldyq qabiletin ǵana emes, tabıǵı talantyn kórsetýge úlken múmkindik ekenin aıtady.
Aıta keteıik, Eva Martonnyń halyqaralyq baıqaýy Vengrııanyń jetekshi joǵary oqý orny – Ferens Lısttiń mýzyka akademııasy negizinde ótkiziledi. Onyń irgetasyn opera dıvasy Eva Marton qalaǵan.
Bizdiń elimizden baıqaýǵa qatysatyn Dinmuhamed Kóshkinbaev áıgili ánshi Bıbigúl Tólegenovanyń H halyqaralyq vokalıster baıqaýynyń laýreaty.
– Bul baıqaýǵa qatysý – meniń armanym. Soǵan jetý úshin biraz eńbektenip, úsh aı daıyndaldym. Ásirese daıyndyq kezinde bizge «Astana Opera» konsertmeısteri Zárý Jazyqbaeva kóp kómektesti. Baıqaýǵa buryn sahnada oryndaǵan shyǵarmalarymen birge F.Lısttiń Lasst mich ruhen romansyn alyp shyǵamyn. Bir qaraǵanda bul týyndy qarapaıym kóringenimen óte kúrdeli, – dese, ekinshi qatysýshy Gúldana Aldadosova: – Jalpy alǵanda, biz baıqaýǵa 8 týyndy daıyndap otyrmyz, olar daýystyń tehnıkalyq múmkindikterin eskere otyryp, onyń aýqymyn, shydamdylyǵyn, sıpatyn kórsetý úshin tańdap alyndy. Birinshi kezeńde barlyq qatysýshyǵa F.Lısttiń shyǵarmasyn oryndaý mindetti sanalǵan. Al ózim baıqaýǵa G.F.Gendeldiń operasynan Alsınanyń arııasyn, V.Bellınıdiń «Kapýlettı men Montekkı» operasynan Djýlettanyń arııasyn, V.A.Mosarttyń «Don Jýan» operasynan Donna Annanyń arııasyn jáne N.Rımskıı-Korsakovtyń «Altyn átesh» operasynan Shemahan patshaıymynyń ánin oryndaımyn, – dedi ol.
Álemniń jas opera ánshileri baq synaıtyn dúbirli dodanyń sońǵy kezeńi 10 qyrkúıekte Vengrııa memlekettik opera orkestriniń qatysýymen ótedi.
