AZAMATTYQ BORYShTY О́TEÝ — QASIETTI PARYZ

Jastardyń Otan aldyndaǵy mindetin óteýge jappaı qulshynysy osyny aıǵaqtaıdy, deıdi Soltústik Qazaqstan oblystyq qorǵanys isi jónindegi departamentiniń bastyǵy Muratbek Zeınýllın. – Muratbek Begaıdaruly, mine, jas­tardy kóktemgi ásker qataryna shaqyrý merzimi de aıaqtalyp qaldy. Tutastaı al­ǵanda, onyń qorytyndysy qalaı aıaqtalǵaly otyr? – Keń baıtaq Otanymyzdyń tynysh­tyǵyn kirpik qaqpaı kúzetý, táýelsiz memleketimizdi kózdiń qarashyǵyndaı qorǵaý – árbir qazaqstandyq úshin zor aby­roı. Bul oraıda, elimizdiń erteńi, bo­lashaǵy – jastarǵa, jas urpaqqa úlken már­tebe bolary anyq. Ata Zańymyzda “Qazaqstan Respýblıkasyn qorǵaý – onyń árbir azamatynyń qasıetti paryzy jáne mindeti” dep aıqyn jazylǵan. Demek, eli­mizdiń azamattary zańda belgilengen tártip pen túrler boıynsha ásker qyzmetin atqarý barysynda bir ǵana maqsatty kóz­deıdi. Ol – Respýblıka qyzmetiniń túbegeıli qaǵıdalary bolyp tabylatyn qoǵamdyq tatýlyq pen saıası turaq­ty­lyqqa, búkil halyqtyń ıgiligin kózdeıtin ekonomıkalyq damýǵa, qazaqstandyq patrıotızmge adal qyzmet etý. Qazaqstan ózge eldermen yntymaqtastyq pen tatý kórshilik qarym-qatynas jasaý, bir-biriniń ishki isterine aralaspaý, qarýly kúshti birinshi bolyp qoldanýdan bas tartý saıasatyn júrgize otyryp memleket aýma­ǵynyń tutastyǵyn, qol suǵylmaýyn jáne bólinbeýin qamtamasyz etedi. Mundaı mártebeli is Qazaqstan Qarýly Kúshterine júktelgen. Búginde Qyzyljar óńiriniń 1500-ge jýyq jastary elimizdiń ár qıy­rynda merzimdi áskerı boryshtaryn adal atqaryp júr. Budan tysqary kelisim-shart boıynsha ásker qatarynda shyńdalýǵa 200-ge jýyq jas óz qalaýlaryn bildirdi. Qazaqstan Respýblıkasy Qarýly Kúshter qataryn rýhy myqty, otan­shyl­dyq sezimi kúshti, elin, jerin jan-tánimen súıetin, qıyndyqtan qaımyqpaıtyn, sana-sezimi joǵary jaýynger-sarbaz­dar­men tolyqtyryp otyrý kúndelikti áde­timizge aınalǵan. Kóktemgi jaýapty shara kezinde ásker qataryna 750-deı jas iriktelip alyndy. Olardyń alǵashqy legin Abylaıhannyń rezıdensııasy aldynda saltanatty túrde shyǵaryp saldyq. Budan keıin respýblıkalyq gvardııa men aero­mo­bıldik bólimshelerge joldama alǵan jas­tar qala ortalyǵyndaǵy elimizdiń mem­lekettik rámizderi beınelengen kompozı­sııalyq alańnan asqaq keıippen attandy. Sońǵy topty jýyrda paıdalanýǵa berilgen Jeńis saıabaǵynan este qalarlyqtaı attandyrýdy kózdep otyrmyz. – Jasyratyny joq, buryndary jastar ásker qataryna barýdan qashqaqtaıtyn. Lajy bolsa, túrli joldarmen qalyp qoıýǵa tyrysatyn. Bul ádetterin namys, ar kórmeıtin. Qazir kerisinshe, sizdiń sózińizden de ańǵarylyp otyrǵandaı, Otan aldyndaǵy mindetti boryshtaryn óteýge umtylys óse túsken tárizdi. Muny nemen túsindirer edińiz? – Táýelsizdiktiń alǵashqy jyldaryn­daǵy aýyrtpalyqtar Qarýly Kúshterge de óz salqynyn tıgizbeı qoıǵan joq. Áskerden qashý, álimjettik jasaý sekildi keleńsiz jaıttardyń oryn alǵanyn bári­miz bilemiz. Elimiz ýaqytsha qıyndyq­tar­dan súrinbeı ótti. Qazir jaǵdaı múl­dem ózgeshe. Elimizdiń Tuńǵysh Pre­zı­denti, respýblıka Qarýly Kúsh­te­riniń Joǵarǵy Bas qolbasshysy Nursultan Nazar­baevtyń sarabdal saıasatynyń arqa­syn­da áskerı re­formalar júıeli júrgizilip, óz jemisin berdi. Temirdeı tártip ornap, áskerı-patrıottyq tárbıe jolǵa qoıyldy. Áske­rı qurylymdar kásibı bilikti ofıser kadr­larmen tolyqty. Sarbazdardyń otan­shyldyq rýhyn kóterý maqsatynda da kóp jumystar atqaryldy. Qazir jastardyń boıynda Qazaqstanǵa, elge, jerge degen sezim kúshti. Otan qor­ǵaýdy bıik syn, aza­mattyq beles dep túsinedi. Jalpy, áskerı bólimderdiń soltústikqazaqstandyq sar­bazdarǵa degen iltıpaty erekshe, qurmeti jo­ǵary. Ony alǵys hattardyń jıi kelýi­nen de ańǵarýǵa bola­dy. Departament te, ata-analar da jıi habarlasyp, jan-jaqty maǵlumat alyp otyrady. “Nur Otan” HDP jastar qanaty, soǵys, eńbek ardagerleri, qadirmendi aqsaqaldarymyz, qoǵamdyq uıymdar da belsendi jumys isteıdi Munyń bári, sóz joq, ár jastyń kóńil-kúıine erekshe áser eteri sózsiz. – Áskerge shaqyrylýshylar arasynda densaýlyǵy syr berip, jaramaı jatatyn­dary kóp pe? Negizinen qandaı aýrýlar jıi kezdesedi? – Buryndary jastar salmaqtyń azdy­ǵynan, boıdyń kemdiginen zardap shegip jatatyn. Aralarynda maıtabandary da kezdesip qalatyn. Qazir bul keleńsizdik tolyq joıylmasa da sıredi deýge bolady. Bálkim, muny turmysymyzdyń jaqsarýy­men, tirshiligimizdiń ońalýymen túsindirýge bolar. Desek te, asqazan aýrýlary áli de ushyrasady. Sońǵy kezderi kóz aýrýlary, qozǵalys-tirek músheleriniń kemistigi paıda bola bastady. Bular – durys tamaqtan­baýdyń, kompıýterdi shamadan tys paıdalanýdyń saldary. Tutastaı alǵanda, áskerge shaqyry­lýshylar arasynda densaýlyǵy jaqsy, sportqa úıir, salamatty ómirge beıim ulan­dar mol. Olardy joǵary jáne orta arnaýly áskerı oqý oryndaryna irikteý de qatań tártip boıynsha júrgiziledi. Bola­shaq ofıserler Qazaqstanmen qatar, Re­seı­de, Ázirbaıjanda, Belarýsta, Túrkııa­da, Germanııada, AQSh-ta, Úndistanda daıar­lanady. Olarǵa tilek bildirýshiler kóp. Bıyldan bas­tap bir aılyq áskerı jıyn ót­ki­zýdi qol­ǵa alǵa­ly otyr­myz. Al­ǵashqy lekte 75 adam qam­tylatyn bolady. Bizdiń aldaǵy maqsatymyz — Otan aldyn­daǵy azamattyq bo­rysh­ty óteý qa­sıet­ti paryz eke­nin jas urpaqqa uǵyndyra berý. — Áńgimeńizge rahmet. Áńgimelesken О́mir ESQALI. PETROPAVL.