Qazaqstanda analogty telehabar taratýdyń sıfrǵa kóshirilýi 2018 jyly bastaldy jáne shynymen de keń aýqymǵa ıe boldy. Sıfrlyq habar taratý dáýirine birneshe oblys qadam basyp, turǵyndardy qamtý deńgeıi 92%-dan asty. Elde analogty habar taratý 2025 jyly toqtatylady dep boljanyp otyr.
Búginde halyqtyń kópshiligi teledıdar kóredi. Bul – aqparat taratýdyń mańyzdy quraly jáne árbir azamattyń konstıtýsııalyq quqyǵy bolyp sanalady. Sıfrlyq habar taratý – aqparattar aǵyny men qazaqstandyqtardyń ómir súrý deńgeıin kóterýdegi jańa sapaly qadam. Sıfrlandyrýǵa kóshý qoǵam men qazirgi zamanǵy tehnologııalardyń damý dınamıkasyn kórsetetin eń mańyzdy tehnıkalyq, áleýmettik, mádenı, ekonomıkalyq jáne saıası másele desek, artyq aıtqandyq emes.
«Sıfrlyq» televızııanyń ereksheligi nede? Sıfrlyq habar taratý – sıgnal berý jyldamdyǵy joǵary jańa býyn televızııasy. Ol kóptegen múmkindikter men qyzmetterdi usynady: kóp arnalar, sýret pen dybystyń úzdik sapasy, elektrondyq poshta, mýltımedııalyq qosymshalar, radıo, batyrmany bir basý arqyly ekranǵa shyǵatyn elektrondyq habarlar baǵdarlamasy, sýbtıtr tilin tańdaý jáne basqa da kóptegen jańashyldyqtar. Sıfrlyq sıgnal kedergige tózimdi jáne kórermenderge, tipti eń alys eldi mekenderge óziniń bastapqy túrinde, bóten shý men burmalanýsyz jetedi.
SETV-ǵa kóshý televızııadaǵy jańa baǵytqa jol ashty. Ol is júzinde keıingi urpaqtyń uıaly baılanysymen tyǵyz baılanysty, televızııa baǵdarlamalaryn bólme ishinde de, júrip bara jatqan kólik ishinde de, mobıldi qurylǵylarǵa da qabyldaýdy qamtamasyz etedi. Sondaı-aq sıfrlandyrý shaǵyn eldi mekenderdiń turǵyndaryna da analogty pishimdegi 2-3 telearnanyń ornyna, sıfrlyq 15 telearnany qabyldaýǵa múmkindik beredi. Sonymen birge, olardy taratýǵa ketetin elektr energııasynyń shyǵynyn edáýir azaıtady.
Qazaqstandyqtar otandyq telearnalardy sıfrlyq sapada jáne aı saıynǵy tólemsiz kóre alady. Olardyń sany oblys ortalyqtary men Nur-Sultan, Almaty, Shymkent qalalarynda 30-ǵa jýyq, al óńirlerdiń eldi mekenderinde 15-ten kem emes. Telearnalar eki tilde – orys jáne qazaq tilderinde usynylady.
2025 jylǵa qaraı sıfrlyq efırlik televızııamen Qazaqstan Respýblıkasy halqynyń kem degende 98%-yn qamtamasyz etý josparlanyp otyr.
Siz turatyn eldi mekende sıfrlyq sıgnaldyń bar-joqtyǵy týraly suraqtarmen sall-ortalyqqa qalalyq telefonnan 193 jáne uıaly telefonnan 8 8000 800 193 nómirleri arqyly habarlasa alasyz – qońyraý shalý tegin.
