Aýyl sharýashylyǵy mınıstriniń mindetin atqarýshy Ábilhaıyr Tamabek Memleket basshysynyń tapsyrmasyna sáıkes, Qant salasyn damytýdyń 2026 jylǵa deıingi keshendi jospary ázirlengenin málimdedi. Ol qant qyzylshasynyń egis alańdaryn keńeıtý arqyly shıkizat bazasyn ulǵaıtýdy, jańa sýarmaly jerlerdi iske qosýdy, sýarýdyń sý únemdeý tehnologııalaryn engizýdi, tuqym sharýashylyǵyn damytýdy, qant qyzylshasyn qaıta óńdeý boıynsha zaýyttardyń qýattylyǵyn tehnıkalyq jáne tehnologııalyq qaıta jaraqtandyrýdy, sondaı-aq jańa ınnovasııalyq zaýyt salýdy kózdeıdi.
Jospardy iske asyrý 2026 jylǵa qaraı qant ımportynyń úlesin 58-den 17%-ǵa deıin azaıtýǵa múmkindik beredi.
Atalǵan taqyryp boıynsha Jetisý oblysynyń ákimi Beıbit Isabaev pen Pavlodar oblysynyń ákimi Ábilqaıyr Sqaqov baıandama jasady.
Talqylaýdy qorytyndylaı kele, Álıhan Smaıylov azyq-túlik qaýipsizdigin qamtamasyz etý men naryqty otandyq ónimdermen tolyqtyrýdyń Úkimettiń strategııalyq mindeti ekenin aıtyp ótti.
«Qalyptasqan jaǵdaı keıbir taýarlyq pozısııalar boıynsha, ásirese qant naryǵynda problemalardyń bar ekenin kórsetti. Biz qant tapshylyǵy men onyń qymbattaýyna qatysty halyqtyń narazylyǵyn kórip otyrmyz. Bul jóninde Memleket basshysy tarapynan da ádil syn aıtyldy. Osyǵan baılanysty atalǵan salany damytý boıynsha keshendi jospar ázirlendi», — dedi Premer-Mınıstr.
Álıhan Smaıylov birinshi kezekte qant zaýyttaryn otandyq shıkizatpen qamtamasyz etý mindeti turǵanyn aıtty. Ol úshin egis alqaptaryn 11,5 myńnan 38 myń gektarǵa deıin, ıaǵnı 3 ese arttyrý josparlanyp otyr.
«Bul aldaǵy bes jylda otandyq shıkizattan qant óndirý kólemin jyl saıyn 250 myń tonnaǵa deıin jetkizýge múmkindik beredi», dedi Úkimet basshysy.
Odan bólek, Premer-Mınıstrdiń aıtýynsha, qant zaýyttaryn barynsha jańǵyrtyp, olardyń óndiristik qýatyn arttyrý qajet.
«Jalpy qantpen qamtamasyz etý jaǵdaıy turaqtaldy. Qanttyń qajetti qory bar. Dúrligýge jol bermeý úshin qant baǵasyna qatysty túrli manıpýlıasııalardyń aldyn alyp, alypsatarlyq áreketter men qajetsiz deldaldardy anyqtaý qajet», dedi Álıhan Smaıylov.
Sóz sońynda Premer-Mınıstr Aýyl sharýashylyǵy mınıstrligine Saýda jáne ıntegrasııa mınıstrligimen jáne óńir ákimdikterimen birlesip, qant salasyn damytý boıynsha keshendi jospardy tolyq kólemde oryndaýdy tapsyrdy.
Aýyl sharýashylyǵy mınıstrligine Saýda jáne ıntegrasııa mınıstrligimen, «Báıterek» holdıngimen birlesip, qant zaýyttaryn jańǵyrtý jáne shıkizat satyp alýǵa aınalym qarajatyn tolyqtyrý úshin jeńildikpen kredıt berý máselesin pysyqtaý tapsyryldy.
Odan bólek, Aýyl sharýashylyǵy mınıstrligine Pavlodar oblysynyń ákimdigimen, «Báıterek» holdıngimen birlesip, óńirde qant qyzylshasy óndirisiniń kólemin keńeıtý sharalaryn qabyldap, Pavlodar oblysynda jańa qant zaýytyn salý máselesin pysyqtaý tapsyryldy.
Saýda jáne ıntegrasııa mınıstrligine ishki naryqty dempıngten qorǵaý úshin qantqa eń tómengi bólshek saýda baǵasyn belgileý máselesin pysyqtaý tapsyryldy.
