QR Qorǵanys mınıstrliginiń baspasóz qyzmetinen málim etkendeı, Máskeý mańyndaǵy «Alabıno» polıgonynda Halyqaralyq armııa oıyndarynyń saltanatty jabylýy ótti.
Sharaǵa Qorǵanys mınıstriniń orynbasary general-leıtenant Sultan Qamaletdınovtyń basshylyǵymen qazaqstandyq delegasııa qatysty.
Oıyndardyń beıresmı komandalyq esebinde Qazaqstan quramasy Reseı men О́zbekstan elderinen keıingi úshinshi oryndy ıelendi.
Atap aıtsaq, Qazaqstan komandasy Jambyl oblysynda ótken «Artıllerııadan oq atý sheberleri» baıqaýynda altyn medal aldy. Áskerı qyzmetshilerimiz Qaraǵandy oblysynda «Taktıkalyq mergen» baıqaýynda da birinshi oryn aldy. Sondaı-aq úzdik nátıje Aqmola oblysynyń «Merıdıan» saıysynda, Armenııada ótken «Beıbitshilik jaýyngeri» saıysynda tirkeldi.
Budan bólek, Qazaqstannyń áskerı teńizshileri Ázerbaıjandaǵy «Teńiz kýbogynyń» kúmis júldesin jeńip aldy.
Kabardıno-Balkarııadaǵy «Elbrýs sheńberi» baıqaýynda áskerı alpınısterimiz birqatar kúrdeli tapsyrmany oryndap, tórtinshi orynǵa ıe boldy. Tartysty jarysta Reseı, О́zbekstan jáne Qytaı qarsylastary úzdik shyqty.
«Tank bıatlonynyń» aqtyq synyna bir qadam qalǵanda qazaqstandyq tankıster jartylaı fınal estafetasynda qytaılyq áskerı qyzmetshilerge jol berdi.
Aıta keteıik, VIII Halyqaralyq armııa oıyndary 12 eldiń 30 polıgonynda ótti. «ArHO-2022» baǵdarlamasy dalalyq, áýedegi jáne teńizdegi jaýyngerlik mashyqty kórsetý boıynsha 34 baıqaýdan turdy.
Qazaqstandyq áskerı qyzmetshiler jeti baıqaýda baǵyn synady, olardyń úsheýi el aýmaǵynda ótkizildi.
