Jazýshy-dramatýrg Ermek Amanshaevtyń lıbrettosy boıynsha qoıylǵan spektakldiń bı qımyldaryn reseılik baletmeıster Konstantın Semenov sahnalady. Plastıkalyq spektakldiń ereksheligi – ártister oqıǵany, keıipkerlerdiń ishki sezimderin bı qımyldary arqyly baıandaıdy. Qoıylym áýenderin kompozıtor Hamıt Shanǵalıev jazǵan.
«Túrkistan mýzykalyq drama teatrynyń ashylǵanyna az ýaqyt ótse de, respýblıkaǵa tanymal bola bastady. Bul Nur-Sultanǵa ekinshi gastroldik saparymyz, oǵan deıin biz Q.Qýanyshbaev atyndaǵy memlekettik akademııalyq qazaq mýzykalyq drama teatrynda Dýlat Isabekovtyń «Bórte» tarıhı dramasyn qoıdyq, endi «Astana Operanyń» tamasha sahnasynda óner kórsetý biz úshin úlken mártebe», deıdi Túrkistan mýzykalyq drama teatrynyń dırektory ári kórkemdik jetekshisi Aınur Kópbasarova.
Spektakl kóshpeli halyqtar tarıhynda tereń iz qaldyryp, qundy ádebı-mýzykalyq mura jasaǵan Qorqyt atanyń ómirin baıandaıdy. Qoıylymda Qorqyt alyp qaraaǵashtan oıyp qobyz jasaıdy, bul aspap óziniń sıqyrly únimen aınalasyn úndestikke jeteleıdi. Alaıda qobyzshynyń ómir jolynda kóptegen synaq kezdesedi. Qaıda barsa da, qaıda kóship-qonsa da, ajaldyń elesi sońynan qalmaıdy. Qıyn joldan ótken soń aqyry Qorqyt týǵan jerine oralady.
Bul spektaklde izgilik nuryn shashqan Qorqyt pen jer betin arazdyqqa toltyrýǵa tyrysqan sıqyrshy Martýdyń arasyndaǵy máńgilik qaqtyǵys zamanaýı horeografııa tilimen áserli beınelenedi. Qoıylym rejısseri Konstantın Semenov Qorqyttyń tutas túrki álemi úshin mańyzdy tulǵa ekenin, sondyqtan týyndyǵa asqan jaýapkershilikpen qaraǵanyn aıtty.
«Meniń oıymsha, spektakl qyzyqty, ınnovasııalyq, kópkomponentti bolyp shyqty, sebebi beıneproeksııa men mol jaryq qoldanyldy. Ártister úshin bul jańa bir beles boldy, sebebi spektakl tutastaı plastıkaǵa negizdelgen», deıdi K.Semenov.
Qoıylymda zamanaýı tehnologııalar men arnaıy effektilerdi qoldaný – Túrkistan teatrynyń basty ereksheligine aınaldy. Qorqyt spektaklinde de jańbyr men tuman syndy tabıǵat qubylystary dybystyq, vızýaldyq effektilermen kórsetiledi.
