Keńes aldynda qatysýshylar teatr dálizindegi baspalar ónimderi men túrli jobalar kórmesin aralady. О́ńir ustazdaryn «Almatykitap» baspasynyń bas redaktory О́mirzaq Ábdishúkiruly bıyl baspadan jaryq kórgen oqýlyqtarmen tanystyryp, TopIQ elektrondyq oqýlyqtar platformasynyń bilim berýdegi artyqshylyqtary týraly aıtyp ótti.
«Bilimdi ult: tereń bilim, eńbekqorlyq jáne otanshyldyq qasıet» taqyrybynda ótken keńeste oblys basshysy salaǵa jasalyp jatqan qoldaý men jetken jetistikterge, alda turǵan máselelerge toqtaldy.
Sońǵy jyldary bilim salasynda aýqymdy reformalar júzege asyrylyp, pedagog mártebesin kóterýde tyń bastamalar qolǵa alyndy. Júıeli jumysty qajet etetin saladaǵy oń ózgerister aımaqtarda da baıqalady. Mysaly, bıyl oblysta bilimge bólingen qarjy byltyrǵydan 17 paıyzǵa artyp, 204,8 mlrd teńgege jetti. Osy jyly sala qarjysy bıýdjettiń 42,8%-yn qurasa, aldaǵy kezeńderde onyń kólemi arta bermek.
Úkimettiń keńeıtilgen otyrysynda balabaqshalarǵa lısenzııalaý tártibin qaıta engizý mindeti qoıylǵany belgili. Bala qaýipsizdigine tikeleı qatysty bul mindetter birinshi kezekte oryndalýǵa tıis. Búginde oblystaǵy 601 balabaqshanyń 439-y jeke sektor úlesinde. Osy balabaqsha quryltaıshylary joǵary jaýapkershilik tanytyp, qaýipsizdik máselesine jete mán berýi kerek. Oblystyq bilim basqarmasy men bilim salasynda sapany qamtamasyz etý departamenti máselege qatysty tıisti daıyndyq sharalaryn júrgizýdi qolǵa alǵany jón.
– Aldaǵy 3 jylda aımaqta 20 memlekettik mekteptiń irgetasy qalanady. Búginde demeýshilerdiń óz qarajatyna salynǵan jeke mektepter jelisi 20-ǵa jetti. Aldaǵy jyldary ınvestor esebinen taǵy 12 mektep salynady. Al bıyl oblysta 6 jańa mektep boı kóteredi, onyń 2-eýin keler aıda, qalǵan 4-eýin jyl sońyna deıin paıdalanýǵa beremiz. Oryn tapshylyǵy jaǵdaıynyń aldyn alý úshin jyl aıaǵyna deıin 1,6 mlrd teńge kóleminde qarjy jumsap, qaladaǵy Abaı mektebine – 550, №101 mektepke 375 orynǵa laıyqtalǵan qosymsha qurylys salynatyn bolady, – dedi oblys ákimi.
Konferensııada Oqý-aǵartý vıse-mınıstri Ǵanı Beısembaev ózgerister zamanynda bilim berý salasynyń damý qarqynyna ilesý úshin ustazdardyń ádistemesi de jańaryp otyrý qajet ekenin aıtyp, jańa oqý jylynyń jańalyqtaryna toqtaldy. Senat depýtaty Murat Baqtııaruly oqýlyqtar máselesin shyǵarý, kolledjderde maman daıarlaý máselesin qozǵady.
Keńeste oblys ákimi ardager ustazdar Tólepbergen Qasymov pen Mark Podolskııge «Qyzylorda oblysynyń qurmetti azamaty» ataǵyn tabystap, toqsannyń tórine shyqqan qos qarııanyń salanyń damýyna sińirgen eńbegine toqtaldy. О́ńir basshysy jýyrda káriz qudyǵyna qulaǵan sábıdi qutqarǵan 15 jastaǵy Arman Amanjolovtyń qatarlastaryna úlgi bolatyn erligin atap ótip, bozbalaǵa demeýshiler jasaǵan syı – eki bólmeli páter kiltin tabystaǵan sátte búkil zal ornynan turyp, aıryqsha qoshemet tanytty.
Úzdik bilim berý grantyna jyl saıyn ótkiziletin konkýrstyń bıylǵy jeńimpazy Aral qalasyndaǵy Uzaqbaı Qaramanov atyndaǵy №262 mektebi 34 mln teńgeniń sertıfıkatyn jeńip aldy. Al oblys ákiminiń grantyn ıelengen 100 oqýshynyń birqataryna osy jıynda bilim berý granty tapsyryldy.
Qyzylorda oblysy
