Jańa álemdik syn-qaterler, geosaıası ahýal, syrtqy áserden týyndaǵan kúrdeli ekonomıkalyq qubylystar el ekonomıkasyna áser etip jatqan ýaqytta qabyldanǵan strategııalyq qujatta Memleket basshysy qoǵamda oryn alǵan barlyq túıtkildi muqııat taldap qana qoımaı, shuǵyl sheshý joldaryn usyndy. Bul – eń aldymen halqymyzdyń ómir sapasynyń jaqsarýyna, balalarymyzdyń bilim alýy men jastar kásipkerligin nyǵaıtýǵa baǵyttalǵan maqsatty jumystar.
Joldaýda aýyl turǵyndaryn sapaly medısınalyq kómekpen qamtý jobasy naqty aıtyldy. Aldaǵy jyldary 650 eldi mekende medısınalyq jáne feldsherlik-akýsherlik pýnktter salynady. Sonyń arqasynda aýylda dárigerlik kómek sapasy jaqsarmaq. Nazar aýdararlyq jaıt, Joldaýda aıtylǵan «Ulttyq qor – balalarǵa» baǵdarlamasy. Endigi jerde Ulttyq qordyń jyl saıynǵy ınvestısııalyq kirisiniń 50 paıyzy balalardyń 18 jasqa tolǵanǵa deıin arnaıy jınaqtaýshy shottaryna aýdarylmaqshy. Osy arqyly jastar bolashaǵyna jol ashamyz. Bul – erteńin oılaıtyn jurttyń qadamy.
El Prezıdentiniń taǵy bir mańyzdy sheshimi – aldaǵy jyly Májilis pen barlyq deńgeıdegi máslıhattarǵa saılaý ótkizý. Jańa qatynastar jaǵdaıynda azamattardyń keń toptarynyń múddesin qorǵaıtyn jáne máslıhattar men Parlament jumysynyń tıimdiligin arttyratyn Parlament quramyn jańartý óte mańyzdy. El damýynyń jaqyn aradaǵy baǵyttaryn aıqyndaıtyn Joldaýda kórsetilgen baǵyttardy asqan jaýapkershilikpen iske asyrý el azamattary úshin syn ekenin, ol úshin birligimizdi bekemdep, halqymyzdyń ál-aýqatynyń artýy úshin aıanbaı jumys isteýimiz qajet ekendigin basa aıtqym keledi.
Amangeldi NUǴMANOV,
Aqtóbe oblystyq máslıhatynyń hatshysy
