4 qyrkúıek kúni keshke Amanat partııasynyń astanalyq bólimshesi ǵımaratynyń aldynda Qostanaı oblysyndaǵy órtten zardap shekkenderge kómek kórsetý úshin gýmanıtarlyq júgi bar 8 júk kóligi jınaldy.
Gýmanıtarlyq kómekti jetkizý úshin Qostanaı oblysyna Nur-Sultan qalasynyń jastar saıasaty máseleleri basqarmasynyń basshysy Qaırat Qambarov bardy.
«Biz bul is-sharany qala basshylyǵynyń, partııanyń tapsyrmasy boıynsha, «Jastar rýhy» jastar qanatymen, elorda eriktilerimen birlesip bastadyq. Kesheden bastap biz áleýmettik jelilerde qalalyq shtab pen arnaıy qor qurylǵany týraly aqparat tarata bastadyq. Sondaı-aq gýmanıtarlyq kómek kórsetý máseleleri boıynsha júginýge bolatyn telefon nómirlerin kórsettik. Qala kásipkerleri birden jaýap qaıtaryp, kólikterin usyndy. Qol ushyn sozǵysy kelgen qala turǵyndary eń qajetti zattardy alyp keldi, bul gıgıenalyq quraldar, sabyn, sýsabyndar, maılyqtar, al ónimderden - un, jarma, qant pen sýsyndar. Bir kúnde biz 8 júk kóligin jınadyq. Taýarlar men zattardy jınaý áli de jalǵasýda. Tańerteń biz elordaǵa qaıta oralýdy josparlap otyrmyz jáne júk kólikteri tolǵan soń, olardy qaıtadan apat aımaqtaryna jiberemiz», dedi Qaırat Qambarov kólikterdiń attanýy aldynda.
Qalanyń Investısııalar jáne kásipkerlikti damytý basqarmasy basshysynyń orynbasary Qýanysh Saparov órtten zardap shekkenderge qajetti zattardyń qalaı jınalǵany týraly aıtyp berdi.
«Qala kásipkerleri jalpy qaıǵyǵa beı-jaı qaramaı, órtten zardap shekkenderge kómek kórsetýdi uıǵardy. Osylaısha biz qajetti zattar men ónimderdi jınaýmen aınalystyq. Tańerteńnen bastap órt sóndirýshilerge júk jetkizýmen aınalysqan qalanyń barlyq kásipkerlerine úlken alǵysymyzdy bildiremiz», dedi Qýanysh Saparov.
Eske sala ketsek, Qostanaı oblysynda órt kezinde zardap shekkenderge gýmanıtarlyq kómek jınaý Qazaqstan halqy assambleıasynda da uıymdastyryldy. Qajetti zattardy qabyldaý 5 qyrkúıekte bastaldy. Barlyq suraqtar boıynsha kórsetilgen telefon arqyly habarlasýǵa bolady: + 7 702 481 20 38, +7 701 466 0345.
