Aımaqtar • 05 Qyrkúıek, 2022

Máńgilikke aınalǵan qas qaǵym sát

330 ret

kórsetildi

1 mın

oqý úshin

Qyzylordadaǵy «Araı Sıtı Moll» saýda ortalyǵynda belgili fotosýretshi, Qazaqstannyń qurmetti jýrnalısi Bolat Omarálıevtiń ár jyldardaǵy týyndylarynan jasaqtalǵan kórme ashyldy. «Qas qaǵym sát, bir ómir» dep atalatyn kórmeni qalalyq mádenıet jáne tilderdi damytý bólimi uıymdastyryp otyr.

Murat JETPISBAEV

Sýretti túsirgen Nurbolat Nurjaýbaı

Kórmeni qala ákiminiń orynbasary Aqzıra Qasymova ashyp, kóp aldynda fotosýretshige shapan jaýyp, qurmet kórsetti. О́ńirdiń jartyǵasyrlyq tarıhyn fotoǵa aınaldyrǵan kesh ıesin quttyqtaǵan «Syr medıa» JShS bas dırektory Amanjol Ońǵarbaev fotosýretshi eńbekterinen kólemdi albom ázirlenip jatqanyn jetkizdi.

Eńbek jolyn aýdandyq basylymnan bastaǵan Bolat Shamauly 45 jyl oblystyq «Syr boıy» gazetinde eńbek etti. Ár jyldary respýblıkalyq basylymdar jarııalaǵan fotokonkýrstar báıgesin ıelenip, Almaty men Máskeý qalalarynda, Polsha, Ýkraına memleketterinde kórmesi uıymdastyrylǵan. О́tken ǵasyrdyń sekseninshi jyldary syrboılyq fotosýretshi týyndylary «Sovetskoe foto» jýrnaly men «Izvestııa» gazetterinde jaryq kórdi. Qazaqstan fotojýrnalıstıkasyna sińirgen eńbegi úshin «Fotoóner qaıratkeri» medalimen marapattalyp, EKSPO-2017 halyqaralyq kórmesi aıasynda elordadaǵy Ulttyq mýzeıde sýretteri qoıyldy.

Kórmedegi kóp eńbektiń arasynan el tarıhyna jazylǵan aıtýly oqıǵalar men tanymal tulǵalardyń ómiriniń bir sátin ǵana beınelegen fotolar kózge shalynady. Taǵy bir qatarda aýyl ómiri, eńbek adamdarynyń tirshiligi tańbalanǵan týyndylar tizilipti. Fotoobektıvke ilingen tabıǵat qubylystary da kórmeden oryn alypty.

Qalalyq mádenıet jáne tilderdi damytý bóliminiń basshysy Jaǵypar Tájmahanovtyń aıtýynsha, kórme saýda ortalyǵynda aptaǵa jýyq ýaqyt turady, aldaǵy ýaqytta ony oblystyq kórkemsýret galereıasynda jalǵastyrý josparlanyp otyr.

QYZYLORDA