Tilsiz jaýdy aýyzdyqtaýǵa kúsh jetkilikti
Jedel shtab saǵat 5 qyrkúıek, saǵat 12:00-de «Baǵanaly aýylyn órtten qorǵap qalý úshin órt sóndirý jasaqtary men arnaıy tehnıka kúshteri qaıta toptastyryldy. Ormannyń 4-shi jáne 8-shi kvartalynda órt bolyp jatyr. Jergilikti atqarýshy organdar Qazanbasy aýyldyq okrýgine qarasty Baǵanaly eldi mekeniniń 11 turǵynyn evakýasııalady. Olardyń ishinde 2 bala bar. О́rt sóndirý jumystaryna 50 tehnıka, Ulttyq ulan áskerıleri, eriktiler men aýyl turǵyndary tartyldy», dep habarlady.
«Qazirgi tańda 6 ushaq órt sóndirý jumystaryna tartylǵan. Onyń tórteýi Tótenshe jaǵdaılar mınıstrligine, ekeýi Qorǵanys mınıstrligine tıesili, kúsh jetkilikti. Tek qazir sý kózderin izdeýde qıyndyqtar sezilýde. Qajet bolsa, sý tasıtyn kóliktermen qosymsha sý jetkizemiz. О́ıtkeni aǵash basyndaǵy jalyndy meılinshe tejeý úshin tikushaqtardy ýaqtyly sýmen qamtamasyz etý kerek. Osylaısha sanaýly kúnderdiń ishinde órtti tolyqtaı aýyzdyqtaý josparlanyp otyr», dedi Tótenshe jaǵdaılar mınıstri Iýrıı Ilın.
О́rshelenip ketken órttiń tek Áýlıekól óńirine ǵana emes, basqa aýdandarǵa da tıgizgen zııany orasan. Mysaly, osy aptada Lısakov qalasynyń irgesindegi úlken saıabaq órtke orandy. Qostanaı qalasyndaǵy birneshe bıznes nysany janyp ketti.
Qarabalyq, Uzynkól aýdandaryndaǵy orman ýchaskeleri men qurǵaq shóp alqaptaryn órt shalyp, kóptiń kúshimen der kezinde sóndirildi. Qarasý aýdanyna qarasty Lıýblınsk aýylyndaǵy alty úı aınalasy bir jarym saǵattyń ishinde qyzyl jalynǵa oranyp, túgel janyp ketti. Lıýblınsk aýyldyq okrýginiń ákimi Andreı Maksımovtiń aıtýynsha, tilsiz jaý 5 qyrkúıek kúni tańerteń tolyqtaı tizgindelgen.
– Qazir zardap shekken alty otbasy týystarynyń úıine ornalastyryldy. Bul otbasylardyń biriniń bir ýchaskede eki úıi bolǵan. Onyń bireýi janyp ketkenimen, ekinshi úı aman. Qazir biz órtten zardap shekkenderdiń múlkin tizimdep, tezirek ótemaqy berý jumystarymen aınalysyp jatyrmyz. Taıaý arada órtten kelgen shyǵyn mólsherin eseptep, kómek kórsetýimiz kerek. Keıbir turǵyndardyń qujattary órtenip ketken. Bul da biraz qıyndyq týǵyzady, – dedi ákim.
Gýmanıtarlyq kómek kórsetilýde
Áýlıekól aýylyndaǵy «Bolashaq» sport kesheninde órtten zardap shekken turǵyndarǵa gýmanıtarlyq kómek kórsetilip jatyr. Tótenshe jaǵdaı mınıstrliginiń áskerı kúshteri Áýlıekóldiń irgesindegi Novonejen aýylynda palatkalar tigip, baspanasyz qalǵandardy ornalastyrýda. Májilis depýtattarynyń bastamasymen Nur-Sultan qalasynda da Áýlıekól jurtyna jylý jınalyp jatqanyn estidik. Respýblıkalyq jedel shtab ókilderi órt kezinde zardap shekkenderdiń qujattary kezekten tys qalpyna keltiriletinin málimdedi.
– Tabıǵı apattan zardap shekken aýdandardaǵy halyqqa qyzmet kórsetý bólimderiniń qyzmetkerleri kóshi-qon polısııasynyń ókilderimen birge órt sóndirýshilerge kómek kórsetýge daıyn. Jeke basty kýálandyratyn qujattardy, sondaı-aq jyljymaly jáne jyljymaıtyn múlikke qatysty qujattardy qalpyna keltirý úshin turǵyndar HQO-ǵa júginýi qajet. Qyzmetkerler azamattarǵa túski úzilissiz qujattardy rásimdeýge kómek kórsetýge daıyn, zardap shekken azamattardy qabyldaý kezekten tys júzege asyrylady, – deıdi Memlekettik korporasııanyń oblystyq fılıalynyń dırektory Mırjan Jańabaev.
Al Eńbek, áleýmettik qorǵaý jáne kóshi-qon komıteti órtten zardap shekken turǵyndarǵa tıesili áleýmettik tólemderdi de aýdara bastady.
– Respýblıkalyq bıýdjetten qyrkúıek aıynda beriletin zeınetaqy, járdemaqy búgin aýdarylady. Bul respýblıkalyq deńgeıde sheshildi. Áleýmettik tólemder órtten zardap shekkenderge ǵana emes, aýdannyń búkil turǵyndaryna, bas-aıaǵy 8 447 adamǵa tólenedi. Onyń ishinde 6 myń zeınetker, 388 kópbalaly ana bar, – dedi atalmysh komıtetke qarasty oblystyq departament basshysy Aınur Sataeva. Munyń syrtynda, Eńbek jáne halyqty áleýmettik qorǵaý mınıstrligi jumyssyz qalǵandarǵa aqyly demalys jarııalamaq.
Sondaı-aq oblystyq polısııa departamentiniń qyzmetkerleri de bir kúndik jalaqysyn órt kezinde zardap shekkenderge kómek kórsetetin biryńǵaı qoǵamdyq qorǵa aýdarady.
– Oblystyń jeke quramy Áýlıekól aýdanynyń órt saldarynan zardap shekken turǵyndaryna kómek kórsetedi. Biz kez kelgen qoldaýdy qajet etetin jerlesterimizge kómektesýdi ózimizdiń azamattyq paryzymyz dep sanaımyz, – degen málimet taratty.
Qaıyrymdylyq sharalarynan Qazaq Oil da tys qalǵan joq. Atalmysh kompanııa Qostanaı oblysynda órtti sóndirýge qatysqan tehnıkalarǵa 50 mıllıon teńgege tegin dızel otynyn berdi. «Qurmetti jerlester! «Qazaq Oil» JQS ulttyq jelisiniń ujymy Qostanaı oblysyndaǵy órt saldarynan qasiretke dýshar bolǵan jandarǵa shynaıy qoldaý bildiretinin jetkizedi. Biz sizdermen birgemiz!», dep janashyrlyq tanytqan kompanııa ujymy jurtty syndarly sátte sabyrly bolýǵa shaqyrdy.
«Biz birgemiz» qaıyrymdylyq aksııasy aıasynda Áýlıekólge Qostanaı un kombınaty, «Dep», «Jas qanat» qus fabrıkasy sııaqty iri kásiporyndar da azyq-túlik jóneltip jatyr.
– Áýlıekól aýdanyndaǵy alapat órtten keıin elimizdiń túkpir-túkpirinen kómek aǵylyp jatyr. Bul baǵytta Qostanaı oblysynyń kásipkerleri men oblystyq Kásipkerler palatasy óńirlik keńesiniń ókilderi de belsendi jumys júrgizýde. Mundaı jaǵdaı eshkimdi beıjaı qaldyrmaıdy. Qazir óńirdegi jaǵdaıdy turaqtandyrý boıynsha barlyq qajetti sharalar qabyldanýda, – dedi oblystyq kásipkerler palatasynyń dırektory Danııar Kúzenbaev.
D.Kúzenbaevtyń aıtýynsha, oblystyq kásipkerler palatasy órtten zııan shekken bıznes nysandarynyń shyǵynyn esepteý jumystaryn júrgizip jatyr.
Qostanaı oblysy
