Kezdesý barysynda taraptar kólik-logıstıkalyq kesheni men ónerkásip jáne paıdaly qazbalardy birlesip ıgerý salalaryndaǵy ózara yntymaqtastyqty damytý jaıyn talqylady.
Búgingi tańda Germanııa Qazaqstannyń negizgi ekonomıkalyq seriktesiniń biri. Sondaı-aq atalǵan el ınvestısııa kólemi boıynsha da kósh bastap keledi. 2022 jyldyń birinshi jartyjyldyǵynda memleketter arasyndaǵy taýar aınylymy 1,6 paıyzǵa artyp, 1,2 mlrd AQSh dollaryn qurady. Qazaqstanda germanııalyq kapıtaldyń qatysýymen myńnan astam zańdy tulǵa qyzmet atqarady.
Qazir kólik-logıstıkalyq salasynda da yntymaqtastyq nyǵaıyp keledi. Atap aıtqanda, bıylǵy alǵashqy alty aıda Germanııanyń Qazaqstan aýmaǵy arqyly tasymaldanǵan tranzıttik júk kólemi 47 paıyzǵa artyp, 2,3 mln tonnany qurady. Basqosýda QR IIDM basshysy qazaqstandyq tarap elder arasyndaǵy avtomobıl kóligi arqyly taýar aınalymyn arttyrýǵa negizdelgen ózara áriptestikti odan ármen damytýǵa nıetti ekendigin jetkizdi.
Budan bólek, búginde azamattyq avıasııa salasynda da birqatar jumys jolǵa qoıylǵan. Qos memleket arasyndaǵy jolaýshylar tasymalyn «AirAstana» jáne «Lufthansa» áýe kompanııalary júzege asyrýda. Avıakompanııalar aptasyna 15 ret turaqty tasymaldaý oryndaıdy.
Germanııa – álemdegi kólik qurastyrý salasyndaǵy jetekshi memlekettiń biri. Kezdesý barysynda vedomstvo basshysy Indýstrııa jáne ınfraqurylymdyq damý mınıstrligi osy tarapta kooperasııalyq baılanystardy arttyrýǵa yntaly ekendigin jetkizdi.
«Qazaqstan-Germanııa kooperasııasy aıasynda ónerkásip salasynda jalpy somasy 719,4 mln dollardy quraıtyn 14 joba tabysty iske asyp, 2,2 myńnan astam jańa jumys orny paıda boldy. Júzege asyrylǵan jobanyń biri retinde aýyl sharýashylyǵy tehnıkalaryn shyǵaratyn «CLAAS» kompanııasymen birlesip oryndaǵan jobany aıtar edim. Búginde kásiporyn turaqty túrde jumys isteıdi. Bıyldyń ózinde zaýyt 80-ge jýyq traktor shyǵardy. Qazaqstandyq naryqqa «CLASS» syndy bedeldi kompanııanyń kelýi osy salanyń damýyna ózindik serpin bergenin atap ótkim keledi. Aldaǵy ýaqytta da bul taraptaǵy yntymaqtastyqty arttyra beremiz degen senimdemin», dep atap ótti mınıstr.
