Máselen, Alan Qurmanǵalıev ústel tennısinen Laosta ótken jasóspirimder men kadetter arasyndaǵy Azııa chempıonatynda úshinshi orynǵa ıe boldy. Ol Azııa chempıonatynyń medalin jeńip alǵan tuńǵysh qazaqstandyq azamat.
Eske sala ketsek, Memleket basshysy Qasym-Jomart Toqaev 15 jasar sportshyny jeńisimen quttyqtap, keleshekte jańa jarqyn jeńisterge jetýine tilektestik bildirgen edi.
Baıdarka men kanoede esý sporty túrinen Marııa Brovkova 1 000 metr qashyqtyqta altyn jáne 500 metr qashyqtyqta qola medal jeńip alǵany da elimiz úshin úlken abyroı.
Damır Toqtarov quzǵa órmeleý boıynsha AQSh-ta ótken jastar arasyndaǵy álem chempıonatynda úshinshi oryn ıegeri atandy.
Al Bolgarııada doıbydan álem chempıonaty ótti. 9 jasqa deıingi rapıd nomınasııasynda Altynaı Samatova álem chempıony atandy, 14 jasqa deıingi jasóspirimder arasynda kúmisti Aıbek Esenǵalıev, 20 jasqa deıingi jastar arasynda qolany Esbol Erenǵaıyp jeńip aldy.
Blıste 27 jasqa deıingi sanatta Altynaı Jumaǵaldıeva álem chempıony atansa, Altynaı Samatova da altyn medal jeńdi. 17 jasqa deıingi sanatta Toǵjan Tájibekova kúmis medal jeńip aldy.
Jastar arasyndaǵy álem chempıonaty kezinde erler men áıelder arasyndaǵy komandalyq álem chempıonaty da qatar ótti. Onda Altynaı Jumaǵaldıeva men Toǵjan Tájibekova eki nomınasııada, ıaǵnı blıs pen klassıka boıynsha qola júldeger atandy.
