Tartyl Fest Qazaqstan Respýblıkasy Prezıdentiniń janyndaǵy «Dara» talanttardy qoldaý qory» QQ jáne qala ákimdiginiń qoldaýymen ótkiziledi.
Nur-Sultan - týrnır ótetin sońǵy 20-shy qala. Festıvaldi ótkizý orny retinde EXPO aýmaǵyndaǵy sahna tańdaldy.
Joba ambassadory Aıtym Jaqypovtyń aıtýynsha, elordada 650-den astam qatysýshy tirkelgen.
Týrnırdiń ashylý saltanatyna QR Mádenıet jáne sport mınıstri Dáýren Abaev, Nur-Sultan qalasy ákiminiń orynbasary Erlan Bekmýrzaev, «Dara» qoldaý qorynyń basshysy Nurlan Qoıanbaev, belgili sportshy Damır Mýmınov, joba ambassadory, qoǵam qaıratkeri Aıtym Jaqypov qatysyp, qatysýshylarǵa sáttilik pen jeńis tiledi.
«Shynynda da, bul naǵyz buqaralyq sport túri bolyp esepteletin oqıǵa. Munda kileń myqtylar jeńedi. Barlyq uıymdastyrýshylarǵa úlken alǵys. Búkil el boıynsha 12 myńnan astam qatysýshy qatysqanyn bilemin», dedi Mádenıet jáne sport mınıstri.
Vedomstvo basshysynyń aıtýynsha, aldaǵy ýaqytta Tartyl Fest festıvali elimizde jyl saıyn ótkiziletin is-sharaǵa aınalady dep josparlanyp otyr.
Festıval 10 shildeden bastap elimizdiń 20 qalasynda ótedi. Oǵan qatysýǵa nıet bildirgen azamattar aqshalaı júldeler utyp ala alady.
Aıta ketsek, ár qalada 27 jeńimpaz tańdalady. Birinshi oryn úshin qatysýshylar 200 myń teńge, ekinshi oryn úshin 100 myń teńge, úshinshi oryn úshin 50 myń teńge aqshalaı syılyq alady.
Ár qalanyń jeńimpazdary elordada ótetin grand-fınalǵa qatysady.
