Alapat órt birjola aýyzdyqtaldy

О́rttiń saldaryn joıý jumystary jalǵasady

7 qyrkúıek kúni saǵat 15.00-de Tótenshe jaǵdaı mınıstri Iýrıı Ilın Áýlıekól aýdanyndaǵy orman órtiniń aýyzdyqtalǵanyn resmı túrde málim etti. Jalpy aýmaǵy 43 myń gektardy sharpyǵan tilsiz jaý besinshi kún degende birjola tizgindeldi. Qazir ormannyń ár jerinde shala janǵan qolamta shoqtaryn sóndirý jumystary júrip jatyr. Amanqaraǵaı, Lesnoe, Ozernoe jáne Baǵanaly aýyldarynyń aýmaqtarynda órtke qarsy qaraýyl qyzmeti tur.

– О́rt sóndirý jumystaryna tartylǵan kúshter men quraldardyń birazy taratylady. Tabıǵı apat ornynda negizinen Qostanaı jáne Aqmola oblystarynyń kúsh quraldary qalyp, órt saldaryn joıý­dy jalǵastyrady. Aqmola oblysynan kel­gen 50 órt sóndirýshi men 8 tehnıka segi­zinshi qyrkúıekke deıin osynda bolady. Sondaı-aq «Vostok» RMK jeke qura­mynyń ınjenerlik tehnıkasy eldi meken­derdiń aınalasyn qaýipsizdendirý úshin jer jyrtý jumystarymen aınalysady.

TJM polkiniń jeke quramy koman­dır­lerimen birge jáne Qostanaı ob­ly­sy­nyń bólimsheleri jumys ornyna oralý týraly sheshim qabyldanǵanǵa deıin oqıǵa ornynda qalady. Qalǵan bólimsheler keshke deıin jumystaryn júrgizip, turaqty jumys oryndaryna oralady, – dedi Iýrıı Ilın.

Bútin eldi alańdatyp, kóptiń qabyr­ǵa­syn qaıystyrǵan alapat órtti sóndirýge TJM, IIM Ulttyq ulan, Qostanaı qala­syn­daǵy IIM akademııasynyń, Qor­ǵanys mınıstrliginiń, JAO jáne oblystyń kommýnaldyq qyzmetteriniń kúsh qural­da­ry – barlyǵy 207 tehnıka, 5 órt sóndirý poıyzy, 1785 adam qatysqan. TJ mınıstriniń aıtýynsha, qyzyl jalyndy aýyzdyqtaýǵa qatysqan 5 tikushaq 5 kún boıy álsin-álsin áýege kóterilip, janyp jatqan ormannyń ústinen 272 ret sý búrkigen.

Amanqaraǵaı men Ozernyı aýyldarynda 91 úı janyp ketti. Búginde baspanasyz qalǵan 16 adam Áýlıekól orta mektebin, bir adam Áýlıekól mektep-ınternatyn panalap otyr. Qalǵan turǵyndardyń birazy óz úılerine oralsa, birazy týys-týǵandarynyń úıinde turyp jatyr.

О́rt bastalǵaly 2091 adam evakýasııa­lan­ǵan. Denesin kúıik shalyp, ókpesine ys tıgen, sondaı-aq túrli deńgeıde jaraqat alǵan 12 adam bar.

Kóp túkirse – kól

Alapat órtten zardap shekken tur­ǵyn­darǵa jan-jaqtan aǵylyp kelip jat­qan gýmanıtarlyq kómek kóp. Ary­sy – elimizdiń ońtústik, batys, shyǵys óńir­le­rinen, berisi – irgeles jatqan oblys­tar men aýdandardan jetken 300-den astam úlkendi-kishili júk kó­likteri Áýlıekóldegi qaıyrymdylyq ortalyǵynyń qoımasyna azyq-túliktiń túr-túrin, jeńil, jyly kıim-keshek pen basqa da tolyp jatqan kúndelikti turmysqa qajetti zattardy taý ǵyp úıip tastaǵan. Onyń bárin volonterler suryptap, tizimdep, turǵyndarǵa úles­tirip jatyr.

Aýdandyq máslıhat hatshysy Dáýlet Qoıshybaıdyń aıtýynsha, Áýlıekólge elimizdiń ár túpkirinen gýmanıtarlyq kómek túrinde kelip jetken kıim-keshek, qant, kartop, makaron, un sııaqty as-sý qory órtten zardap shekkenderdiń muqtajyn óteýge tolyq jetedi.

– Búginge deıin 500 tonnadan astam ónim jetkizildi. Aýdanǵa el kóleminen uzyn sany 302 kólik keldi. Onyń ishinde 279 GAZel, 15 refrıjerator, 2 KamAZ jáne jeńil kólikter bar. Jınalǵan ónimder órtten zııan shekken turǵyndardy qamtamasyz etýge jetkilikti. Búkil Qazaqstan halqyna sheksiz alǵysymyzdy aıtamyz. Tipti elden azyq-túlik jiberýdi toqtata turýdy ótinip suradyq. Endi turǵyn úı salý jumystarynyń bastalýyna baılanysty, qurylys materıaldaryna degen qajettilik bar. Pavlodar oblysy alǵashqy bolyp 2 júk kóligimen qurylys materıaldaryn jiberdi. Basqa da óńirler kómek qolyn sozýǵa nıet bildirip otyr. Taǵy bir aıta keterligi, qarjylaı járdemdeskisi keletin aza­mattarǵa bizde bir ǵana esepshot bar ekenin eskertemiz. Jekelegen adamdarǵa kómekteskilerińiz kelse, turǵyndardyń ózderimen baılanysýlaryńyzǵa bolady. Olarǵa as-sý, kıim-keshek, kórpe-tósek qana emes, shkaf, kereýet, ózge de turmystyq tehnıkalar qajet, – dedi Dáýlet Qoıshybaı.

Máslıhat hatshysy zardap shekken adamdardyń qujattary da qalypqa keltirilip jatqanyn aıtty. Eriktiler sany kún saıyn artyp, birlikti iske bilek sybanyp kirisip ketken.

Balabaqsha qurylysyna 1,3 mlrd teńge bóledi

О́rt saldarynan júzge jýyq úı órtenip, jergilikti turǵyndardyń ómiri men qaýipsizdigine qaýip tóndi. Úkimet turǵyndardy qoldaý jáne qıyn jaǵdaıdan shyǵý úshin barlyq múmkindikterdi paıdalanyp, tabıǵı apattyń zardaptaryn joıý boıynsha belsendi jumys júrgizýde.

Áýlıekól turǵyndarynyń basyna túsken aýyrtpalyq eshkimdi beıjaı qaldyrǵan joq. Orman órtinen oısyrap qalǵan jurtqa elimizdiń ár óńirinde eńbek etip jatqan kásipkerler men qoǵam qaıratkerleri de kómek kórsetýge nıetti ekenin bildirip jatyr. Munyń bir mysaly, «Halyq» qaıyrymdylyq qory Áýlıekól aýdanynda orman órtinen zardap shekkenderge arnap 280 oryndyq jańa balabaqsha salý úshin 1,3 mlrd teńge bóldi.

Balabaqsha qurylysy taıaý arada bastalyp, kelesi jyly kishkentaı bal­dyrǵandardy qabyldaý úshin esigin aıqara ashatyn bolady.

– О́rtten zardap shekken tur­ǵyn­dar­dyń barlyǵynyń qaıǵysyna ortaqpyz. Bizdiń kómegimiz olardyń basyna túsken aýyrtpalyqty sál de bolsa jeńildetip, bolashaqta qalypty ómirge tez oralýyna septigin tıgizedi degen úmittemiz, – deıdi «Halyq» qorynyń ókilderi.

Qostanaı oblysy