«Qazaqstan barysynda» Atyraý namysyn S.Zakarııaev qorǵaıdy

ATYRAÝ. 14 mamyr. Oblysta «Qazaqstan barysy» týrnırine irikteý jarysy aıaqtaldy. Onda respýblıkalyq fınalda aımaqtyń namysyn taǵy da Suńǵat Zakarııaevtyń qorǵaıtyny belgili boldy. Bul týraly egemen.kz tilshisi habarlady. Týrnırde munaıly óńir sportshylarynan 20-dan astam palýan baq synasty. Tartysty básekede qarsylastarynyń jaýyryn jerge tıgizip, aılasyn asyrǵan úrkerdeı top alǵa shyqty. Olardyń arasynan 21 jastaǵy palýan Suńǵat Zakarııaevtyń baǵy jandy. Palýannyń ákesi Hısmet Qýanaev ta talaı ret túıe palýan atanǵan tanymal sportshy edi. Qazir Qyzylqoǵa aýdanyndaǵy sport mektebinde balalardy kúres túrlerine jattyqtyrady. Ákesinen úlgi alǵan Suńǵat dzıýdodan sport sheberi atanǵan. Salmaǵy 80 kılodan asatin ol munda barlyq qarsylastaryn qapy qaldyryp, aqtyq synda Bekbolat Salyqovty utty. Sóıtip, qatarynan ekinshi jyl «Atyraý barysy» atandy. Osylaısha S.Zakarııaev bıyl taǵy da Atyraý oblysynyń namysyn «Qazaqstan barysy» týrnırinde qorǵaıtyn boldy. Joldasbek Shópeǵul. Derekkóz: egemen.kz. Foto: www.astana-motors.kz.