Bul syn – delsal kúıdegi qoǵamnyń ústine muzdaı sý quıyp jiberýmen bir esep. Bos sóz ben jalyndy uran – keshegi, tipti erinbegenniń bári mineýge beıim qyrmyzy-qyzyl dáýirimizdiń shyndyǵy edi. Munyń sebebin, Ahmet Baıtursynuly paıymdaǵandaı, «Jaqsy nárseniń jolǵa shyǵýy – jaman nárseden qıynyraq» dep túsindiremiz. Búgingi jaqsy nárse – ádiletti memleket, birtutas ult, berekeli qoǵam. Bul – ýtopııa emes, tyryssa, bas biriktirse, tize qossa, oqý-toqýy bar, qıyndyqtan sabaq alǵan kez kelgen qoǵam qol jetkize alatyn ıgilik.
Iá, Prezıdent shegelep aıtty: «Ekonomıkalyq saıasatymyzdyń negizgi maqsaty esh ózgermeıdi. Onyń máni – sapalyq jáne ınklıýzıvtik turǵydan halyqtyń ál-aýqatyn arttyrý». Júıeli is-shara men qoǵamnyń bar jigin ıkemdi serpiltýge baǵyttalǵan jobalardyń máni qabyldanýymen emes, nátıjesimen ólshenedi. Joldaýdaǵy bes baǵdardan osy nıettiń, ustanymnyń ózegin ańǵaramyz.
Bizdińshe, halyq qaı kezde de istiń kózin biletin, máseleniń mánisin jatyq túsindirip bere alatyn azamattardy ańsaıdy. Mundaı jaýapty tulǵalar qalada da, dalada da, elordada da, óńirlerde de jetip artylady.
Buqaralyq aqparat quraldarynyń asyl mindeti de – bılik pen qoǵam arasyndaǵy áriptestikti, úılesimdi qalyptastyrý men jetildirý. Bul Qazaqstan tájirıbesinde kezeń-kezeńimen júzege asyp keledi.
Ádiletti memleket, birtutas ult, berekeli qoǵam týraly pikir, oı aıtýda da jalyndy uran qajet emes ekeni beseneden belgili. Bul – baspasóz ben qoǵamdyq uıym alańdaryna júkteletin jaýapty mindet.
Áleýmettik-ekonomıkalyq qıyndyqtar tusynda kóńili alań halyq senim men tııanaq taba almaı qınalady. Búginge jáne bolashaqqa degen senim men tııanaq qaıdan keledi? Syldyr sózben, jattandy derekpen kelmesi aqıqat. Sondyqtan jurtshylyq qaı ortada bolsyn, az nárseden bolsyn nátıje shyǵarǵan adamdardyń aýzyna qaraıdy. Úmit, senim jaqsylyqqa bastaıdy.
Shynaıy aqparat, baıypty taldaý, zerdeli tujyrymdama, salıqaly qorytyndy – búgingi BAQ-tyń álippesi. Árıne, álippeni attap ketkender saýattylarǵa ilese almaı qalady.
Ádiletti memleket, birtutas ult, berekeli qoǵam qaınaýyn da, tolǵamyn da, kúıinishi men súıinishin de jetkizetin – aqparat quraldary. Sońǵy jyldary «otanshyldyq» deı turyp – memleketshildiktiń, «ult» deı turyp –elshildiktiń mánin túsinbegen, mazmunyn sińirmegen otandastar paıda bolǵanyn jasyra almaımyz. Árıne, bul úshin ózimizden basqa eshkimdi jazǵyrmaımyz. Mindet – osyny aqylmen túzetý. Bul týraly Prezıdent Ulytaýda ótken Ulttyq quryltaıda jetege jetkizetindeı etip aıtty.
Bizde kem nemese jetildirýdi talap etetin basqa zárýlikter az emes. Alash zııalylary muny «ulttyń joǵy» depti. Álıhan Bókeıhannyń sózimen túıindesek, «Ulttyń joǵyn uıyqtap júrip emes, oıaý júrip izdeý kerek!».
Biz qoǵam pikiriniń, áleýmet paıymynyń, azamattar tanymynyń elshil, otanshyl bolýy úshin qyzmet etýimiz kerek. Qalam qýatynan qarapaıym eńbegimizge deıin, azamattyq belsendilikten kúndelikti turmys-tirshilikke deıin osyǵan baǵyttalýy qajet. BAQ-tyń mádenı-ıntellektýaldyq, rýhanı-aǵartýshylyq mıssııasy – osynda. Biz mereıtoılyq ásire maqtaýlardan, «jylt etkendi jarq etkizetin» otshashýlardan góri adamnyń janyn, sezimin baýraıtyn, júrek kózin ashatyn is-sharalarǵa yntyq bolǵanymyz jón. Bılik pen qoǵamnyń shynaıy áriptestigi – bilmegenin bireý jazyp bergen materıal negizinde aıtý emes, biletinge, ıakı mamanǵa minber berýde. Ult jaýapkershiligi, el múddesi osyndaı kásibılikten bastalady.
Aqparat salasyna kelsek, qazir bar jerdi jaýlap alǵan «oıyn-saýyq baǵdarlamalarynyń» ózinde oısyz yrqyl-jyrqyl emes, oıly ázil, ashy satıra, mándi parodııa, astarly sharj bolýy kerek. Áıtpese shet jurttan jalań kóshirý ult sapasyn, talǵamyn óshirýge aparyp soǵady. A.Baıtursynuly dál ańǵarǵandaı, «durystyq-burystyqty bilmegen jurt azady». Biz qalyptaspaǵan jas býyn týraly aıtyp otyrmyz.
Qazir memlekettik, qoǵamdyq, jekemenshik mártebedegi BAQ-tyń ortaq ymyraǵa keletin kezeńi. Ol ymyranyń aty – el taǵdyry, árbirimizdiń bolashaǵymyz. Zaty – ádiletti memleket, birtutas ult, berekeli qoǵam.
