Turǵyndardyń jumysqa ornalasýyna kómektesý úshin uıymdastyrylǵan jármeńkege 60-tan astam jumys berýshi qatysty.
Jármeńkege elordanyń 65 jumys berýshisi qatysyp, 1700-den asa bos jumys orny usynyldy. Onyń ishinde probasııa qyzmeti esebindegilerge jáne jazasyn ótep kelgen jumyssyz azamattarǵa da jumys oryndary usynyldy. О́ndiristik kompanııalar, saýda, qarjy, qurylys salasyndaǵy mekemeler jumys izdep júrgen azamattarǵa aqparattyq-túsindirý jumystaryn júrgizip, túıindemelerin qabyldady.
«Búgingi jármeńkede 1500-ge jýyq jumys orny usynyldy. Sondaı-aq munda bas bostandyǵynan aıyrý oryndarynan bosatylǵan jáne probasııa qyzmetinde esepte turǵan adamdarǵa arnalǵan usynystar bar ekenin atap ótken jón. Bul jármeńkedegi jalaqy shamamen 150 000 teńgeden 300 000 teńgege deıin», dedi Nur-Sultan qalasynyń Jumyspen qamtý jáne áleýmettik qorǵaý basqarmasy basshysynyń orynbasary Erlan Júsipov.
Is-sharada oqý oryndarynyń túlekterine, jastarǵa jáne jalpy elorda turǵyndaryna «Alǵashqy jumys orny», «Jastar tájirıbesi», «Qoǵamdyq jumystar», «Urpaqtar kelisimsharty» baǵdarlamalary jáne zeınet jasyna deıingi jumyssyz azamattar úshin «Kúmis jas» jobasy boıynsha keńinen aqparat berilip, azamattarǵa áleýmettik jumys oryndary usynylady. Jumyspen qamtý ortalyǵynyń mamandary qysqa merzimdi kásibı oqýǵa qyzyǵýshylyq tanytqandarǵa da tolyq aqparat beredi.
«Jármeńkege úshinshi ret qatysyp otyrmyz. Bul ár jumys berýshige qajetti qyzmetkerdi tabýǵa kómektesedi. Máselen qazirgi ýaqytta bizge keńesshiler qajet. Olar klıentterdi izdeý, depozıtter ashýmen aınalysady», dedi «Otbasy bankiniń» ókili Asqar Rahymbaev.
Jármeńke arqyly jumys tabýǵa nıetti azamattardyń birqatary eńbekke endi aralasatyn jas mamandar bolsa, endi biri ózderine yńǵaıly jumys ornyn tabýdy kózdeıdi. Solardyń biri – elordadaǵy oqý oryndarynyń birinde magıstratýrada bilim alyp jatqan Sultan Turapbaı da jármeńkeden jumys tabýǵa úmitti.
«Qazirgi kezde magıstratýrada bilim alyp júrmin. Biraq oqýmen qatar jumys istegim keledi. Munda jumys berýshiler óte kóp. Solardyń ishinde ózime qajetti jumysty tabamyn degen oıdamyn», dedi Sultan Turapbaı.
Aıta keteıik, Nur-Sultan qalasynda jyldyń sońyna deıin 28 myń jańa jumys orny qurylady. Bos jumys oryndary jármeńkesiniń maqsaty – jumys berýshiler málimdegen azamattardy bos jumys oryndaryna ornalastyrý. Qalalyq halyqty jumyspen qamtý ortalyǵynyń málimetinshe jyl sońyna deıin áli osyndaı 6 bos jumys oryndar jármeńkesi ótedi.
