Tarqata aıtar bolsaq, Mádenıet jáne sport mınıstri Dáýren Abaev Májiliste «Qazaqstan Respýblıkasynyń kınematografııa jáne mádenıet máseleleri boıynsha keıbir zańnamalyq aktilerine ózgertýler jáne tolyqtyrýlar engizý týraly» zań jobasyn tanystyrý barysynda málimdedi. Mınıstrdiń aıtýynsha, túzetýler kınematografııa salasynyń qarqyndy damýyna negizdelgen. «Ulttyq fılmderdi shyǵarý kezinde satyp alynǵan sahnalyq-qoıylymdyq quraldardy saqtaý jáne paıdalaný máselesin retteý usynylady. Biz dekorasııalar, pavılondar, sahnalyq jabdyqtar týraly aıtyp otyrmyz», dedi mınıstr. Sondaı-aq mınıstrlik «Qazaqfılmdi» fılmderdiń memlekettik qoryn saqtaýdy júzege asyratyn zańdy tulǵa retinde bekitýdi usynady.
Sonymen qatar túzetýler aıasynda sheteldik anımasııalyq fılmder men otbasylyq fılmderdi qazaq tiline dýblıajdaýǵa memlekettik qoldaý qarastyrylǵan, sondaı-aq túsirilim kezinde sýbsıdııa alýǵa úmitker halyqaralyq kınostýdııalar úshin talaptar jeńildetiledi. Depýtattardyń saýaldaryna jaýap bere otyryp, Dáýren Abaev elimizde fılmder túsirý kezinde sýbsıdııa alýǵa úmitker halyqaralyq kınostýdııalar úshin talaptar jeńildetiletinin atap ótti.
«Mádenıet týraly» zańǵa ózgerister engizý sheńberinde el ishinde jáne shetelde memleket esebinen ótkiziletin mádenı is-sharalardy uıymdastyrýda jáne qarjylandyrýda jańa qaǵıdalar men tásilder bekitiledi. Sol sııaqty mınıstrlik tarıhı-mádenı murany qorǵaý qyzmetin memlekettik qoryq-mýzeılerge júkteýdi usynady.
Búginde elimizde 12 respýblıkalyq jáne 3 kommýnaldyq qoryq-mýzeı jumys isteıdi, olardyń ıeliginde 500-den astam tarıhı-mádenı mura obektisi bar. «Qoldanystaǵy zańnamada olardy qorǵaý qyzmeti anyqtalmaǵan. Bizdiń túzetý osy olqylyqty joıýy kerek», dedi mınıstr.
