Memleket basshysynyń tapsyrmasyn oryndaý maqsatynda, sondaı-aq buqaralyq sportty damytýdyń basymdyǵyn eskere otyryp, dene shynyqtyrýmen jáne sportpen shuǵyldanatyn azamattardyń sanyn arttyrý maqsatynda Nur-Sultan qalasynda arnaıy baǵdarlamalar men túrli jobalar ótkizý josparlanǵan.
Qalalyq Dene shynyqtyrý jáne sport basqarmasynyń basshysy sport baǵytynda qolǵa alynǵan is-sharalar jóninde tolyǵyraq aıtyp berdi.
«Qoljetimdi sport» jobasy 2021 jyldyń jeltoqsan aıynyń sońyna deıin jalǵasyp, 20 myńǵa jýyq elorda turǵynyn qamtydy. 2022 jyldyń sáýir aıynan bastap atalǵan joba qaıtadan qolǵa alyndy. Atalǵan joba elorda turǵyndaryn sporttyń 5 túrine baýlıdy. Jobaǵa bilikti nusqaýshylar men jattyqtyrýshylar jumyldyryldy. Olar qala saıabaqtary men tynym baqtarynda sabaq ótkizedi. Joba 2022 jyldyń jeltoqsan aıynyń sońyna deıin jalǵasady. Qala turǵyndary úshin skandınavııalyq júris, júgirý, karate, ústel tennısi, fıtnes jáne ıoga sııaqty sport túrleri qoljetimdi bolady», dep atap ótti basqarma basshysy.
Spıker brıfıng barysynda AulaFit jobasy jaıly aqparat berdi.
«2020 jylǵy 25 mamyrdan bastap Nur-Sultan qalasynda #AulaFit baǵdarlamasynyń pılottyq jobasy qurylyp, iske qosyldy. Turǵyn úı keshenderiniń turǵyndary sportpen qadamdyq qoljetimdilikte, sondaı-aq tegin negizde aınalysa alady. Aǵa býyn, jastar men balalar kún saıyn sportpen shuǵyldanady, bos ýaqyttaryn, demalystaryn qyzyqty jáne paıdaly ótkizedi, psıhologııalyq qoldaý alady», dedi Samat Jylqybaev.
Onyń aıtýynsha, elordada «Asar Joly» aksııasy da ótip jatyr.
«Osy baǵdarlamalar aıasynda elordada fýtbol, strıtbol sııaqty sporttyq oıyn túrleri boıynsha aýla lıgalary ótkizildi. Sonymen qatar halyqtyń sportpen shuǵyldanýyna da barlyq jaǵdaı jasalynǵan. Naqtyraq aıtsaq, qalada 18 sport kesheni, 1500 jáne odan da kóp oryndyq trıbýnasy bar stadıon, 27 basseın, qurama komandalardy daıyndaý ortalyqtary jáne sol sııaqty 44 tennıs korty bar. Búkilálemdik pandemııaǵa baılanysty sporttyq is-sharalardyń toqtatylǵanyn eskere otyryp, elorda turǵyndarynyń sportqa degen qyzyǵýshylyǵyn arttyrý maqsatynda ár aı saıyn júgirý jáne velojúgirýden onlaın jarystar uıymdastyrǵan edik. Qala turǵyndary ózderine qolaıly ýaqytta, kez-kelgen saıabaqta júgirip, qorytyndysymen «Strava» qosymshasy arqyly bólise alady», dedi ákimdik ókili.
Aıta ketsek, qala turǵyndary men qonaqtary asyǵa kútetin, qalyptasqan dástúrli sporttyq sharalar da ótkizilip keledi. Máselen, dzıýdodan Azııa chempıonaty, «Qazaqstan Barysy» respýblıkalyq týrnıri, sadaq atýdan halyqaralyq týrnır, búrkitshilerdiń halyqaralyq týrnıri, fýtboldan «Nur-Sultan qalasy ákiminiń kýbogy» respýblıkalyq týrnır, elorda kúnine oraı ótetin báıge túrlerinen jarys, buqaralyq velosherý jáne qysqy maýsymdyq jarystar, gımnastıkadan respýblıkalyq chempıonat, jasóspirimder arasynda erkin kúresten J.Úshkempirov atyndaǵy halyqaralyq týrnıri, «Burqasyn» qysqy festıvali, trıatlonnan Azııa chempıonaty, «Qysqy trıatlon» jarysy, jeńil atletıkadan halyqaralyq týrnıri, t.b.
