Áýeli 7 qyrkúıekte «Qazan Halyqaralyq musylman kınosy festıvali» aıasynda qazaqstandyq fılmderdiń kórsetilimi uıymdastyryldy, onda rejısser Iýlııa Zaharovanyń «Tarlan» fılminiń tusaýkeseri ótti. Bul kartına Ǵalymjan Ibragımovtyń «Almachýar» povesiniń jelisimen túsirilgen «Tatarkıno» jáne Almapictures birlesken jobasy.
Baıqaýǵa sondaı-aq rejısser Adaı Ábeldınovtiń tolyqmetrli tarıhı anımasııalyq «Kúltegin» fılmi usynyldy. Taspa kóptegen kóshpeli etnosty bir týdyń astyna biriktirgen Túrki qaǵanatynyń belgili áskerı qolbasshysy Kúlteginniń jas kezi týraly baıandaıdy. Festıval aıasynda Gúlnár Sársenova men Vahtanga Hýbýtııanyń Vladımır Kýnınniń attas kitabyna negizdelgen «Orystar Marıenplasta» atty dramalyq fılmi de kórsetildi.
Brıtandyq kınorejısser jáne ssenarıst Djessı Djonsonnyń «Ave Marııa» fılmin Qazanda prodıýser Erken Iаlgashev tanystyrdy. Qazandyq kórermen úshin taǵy bir tartý – Generation14Plus baǵdarlamasynda Berlın kınofestıvaliniń Gran-prıin jeńip alǵan Farhat Sháripovtyń «Shema» fılminiń kórsetilimi ótti. Bul sensasııalyq «18 kılogers» fılm trılogııasynyń ekinshi bólimi. Sol sııaqty Musa Jálel atyndaǵy Tatar memlekettik akademııalyq opera jáne balet teatrynda Qazaqstan Respýblıkasy óner sheberleriniń gala-konserti boldy. Konsertke Qurmanǵazy atyndaǵy Qazaq ulttyq halyq aspaptar orkestri, Qazaqstannyń eńbek sińirgen ártisteri Seken Turysbekov, Aıgúl Úlkenbaeva, Qazaqstannyń eńbek sińirgen qaıratkerleri Aıgúl Elshibaeva, Saltanat Ahmetova, Batyrjan Myqtybaev jáne elimizdiń basqa da tanymal ánshileri men shyǵarmashylyq ujymdary qatysty. Konsert bastalar aldynda Elabýga memlekettik tarıhı-sáýlet jáne sáýlet óneri qorynan alynǵan qazaqstandyq sýretshilerdiń sýret kórmesi uıymdastyryldy.
