Jýyrda Tuńǵysh Prezıdent kitaphanasynda Májilis depýtattary, Ázerbaıjan prezıdenti ákimshiliginiń janyndaǵy Áleýmettik zertteýler ortalyǵy, Eýrazııalyq ıntegrasııa, Qazaqstan qoǵamdyq damý ınstıtýty, Qoǵamdyq saıasat, Ekonomıkalyq saıasat, Ǵylym jáne joǵary bilim mınıstrligi Ǵylym komıtetiniń Memleket tarıhy, «Alternatıva» ózekti zertteýler ortalyǵy jáne Qazaqstannyń strategııalyq zertteýler ınstıtýttarynyń basshylary men sarapshylary, Ulttyq quryltaı músheleri Joldaýdaǵy basymdyqtardy talqylady.
– El Prezıdenti Q.Toqaevtyń Qazaqstan halqyna Joldaýy qoǵamdy jańǵyrtý úderisindegi mańyzdy kezeń. Respýblıkalyq referendýmnyń negizinde qolǵa alynǵan konstıtýsııalyq reformanyń túıindi ıdeıalarynyń qısyndy jalǵasy ispettes. Memlekettik mańyzy joǵary sheshimderdi qabyldaý prosesinde otandastarymyzdyń sheshýshi daýysqa ıe bolýyna basymdyq berilýi «Halyq únine qulaq asatyn memleket» tujyrymdamasynyń is júzinde oryndalyp jatqanyn dáleldeıdi, – dedi Tuńǵysh Prezıdent kitaphanasynyń dırektory Baqytjan Temirbolat.
Memleket basshysynyń kezekti Joldaýy jalpyulttyq referendýmnan keıin qazaqstandyqtar saıası jańǵyrtý baǵytyn qoldap, elimiz damýdyń jańa kezeńine aıaq basqan tusta buǵan deıingi qujattyń zańdy jalǵasyndaı qabyldandy. Osyny eskersek, kelesi qadam ekonomıkany nyǵaıtýǵa arnalmaq.
– Joldaýdy belgili bir salalardaǵy memlekettik saıasat paradıgmasyn ózgertý turǵysynan betburys dep ataýǵa bolady. Áleýmettik saıasat túbegeıli qaıta qaralyp, qoǵamda tek memleketke ǵana úmit artý joq ekeni jáne eldegi turaqty jumys oryndarynyń sanyn arttyrý máselesin tezirek sheshý qajet ekeni aıtyldy, – dedi Eýrazııalyq ıntegrasııa ınstıtýtynyń dırektory Orazǵalı Selteev.
Joldaýda kóterilgen mindetter júıeli túrde oryndalatyn bolsa qazaqstandyqtardyń turmys sapasy, əl-aýqaty artatyny ras. «Joldaýdyń aldynda ulttyq aýqymdaǵy teńdessiz konstıtýsııalyq reforma boldy. Endi Memleket basshysy jańa ekonomıkalyq saıasatty júrgizýge kúsh salý kerektigin aıtty. Barlyq josparlanǵan konstıtýsııalyq reforma júzege asyrylǵannan keıin Qazaqstan qýatty ekonomıkalyq serpiliske ıe bolady dep senimmen aıta alamyn», dedi Ekonomıkalyq saıasat ınstıtýtynyń prezıdenti Qaıyrbek Arystanbekov.
Jıyn barysynda birqatar sarapshy Memleket basshysynyń áleýmettik-ekonomıkalyq jáne saıası bastamalaryna biraýyzdan qoldaý bildirdi.
