Osy ýaqytqa deıin atalǵan aýyl turǵyndary 1973 jyly salynǵan eski ǵımaratta em-dom qabyldasa, endi jarqyraǵan jańa mekemede medısınalyq kómek kórsetilmek. Turǵyndardy qýanyshty sátimen Aqsý aýdanynyń ákimi Esim Bazarhanov pen aýdannyń bas dárigeri Saltanat Myqtybaeva quttyqtady.
Medısınalyq ortalyqty «Qydyráli» sharýa qojalyǵynyń jetekshisi Tólegen Maqashev salyp berdi. Jańa áleýmettik nysannyń lentasy qıylǵan soń aýdan basshysy men jergilikti turǵyndar medısınalyq pýnktiń ishin aralap kórdi. Munda feldsherlik kabınet, ekpe bólmesi ornalasqan. Kabınetterdiń bári de tolyqtaı jabdyqtalyp, aýyldaǵy 400 turǵynnyń barlyǵyna qajetti medısınalyq kómek kórsetýge ázir.
«Endi munda kúndelikti densaýlyǵyna shaǵymdanǵan jandarǵa kómek kórsetiledi. Qandaı da shuǵyl jaǵdaı oryn alyp jatsa da, kúndiz-túni qyzmet kórsetýge daıynbyz», deıdi aýyl alǵysyna bólengen medbıke Aqmaral Nuralınova.
Aýyldaǵy medısınalyq pýnktiń ashylýy turǵyndar júzine qýanysh uıalatty. Ásirese densaýlyǵyna jıi shaǵymdanatyn qarttar úshin bul úlken ıgi is. Endi olar kez kelgen másele boıynsha alysqa barmaı-aq, jergilikti mamandarǵa júgine alady.
Aıta ketý kerek, memleket qoldaýy aıasynda Taras aýylynda 2018 jyly jańa mektep paıdanalýǵa berilse, byltyr aýyldyń kirme joly jasalǵan.
Jetisý oblysy
