Shardara aýdandyq polısııa bóliminiń polıseıleri kezekti reıd barysynda Shardara sý qoımasynda garpýndy paıdalanyp zańsyz balyq aýlaǵan eki jergilikti turǵyndy anyqtady. Brakonerlerden 100 kelige jýyq balyq, 3 garpýn jáne 2 súńgýir kostıými tárkilendi. Bul derek Qazaqstan Respýblıkasy Qylmystyq kodeksiniń 335-baby «Balyq resýrstaryn, basqa da sý janýarlaryn nemese ósimdikterin zańsyz óndirý» boıynsha tirkeldi.
«Jyl basynan beri oblysta barlyǵy 32 ekologııalyq qylmys jasalǵan. Olardyń ishinde balyq aýlaý, jer qoınaýyn ruqsatsyz paıdalaný, ósimdikter men janýarlardyń sırek túrlerin zańsyz aýlaý jáne óndirý jatady. Polısııa qyzmetkerleri zańsyz balyq aýlaýǵa qatysty 18 qylmystyń jolyn kesti, onyń ishinde 14 is sotqa joldandy», dep habarlady Túrkistan oblysynyń polısııa departamenti.
Sondaı-aq brakonerlerden 3 tonnaǵa jýyq zańsyz aýlanǵan balyq, 33 qaıyq, 4 borttyq motor jáne zańsyz balyq aýlaýǵa arnalǵan 44 túrli qural tárkilendi.
