Ulttyq anımasııa atasynyń ómirindegi eń jarqyn sátterge negizdelgen fılm «Ámen aǵanyń ǵajaıyp aǵashy» jumys ataýymen qysqametrli anımasııalyq týyndylardyń qataryn tolyqtyrmaq. Atalǵan kartına Sh.Aımanov atyndaǵy AQ «Qazaqfılm» kınostýdııasynda Ulttyq kınony qoldaý memlekettik ortalyǵynyń qoldaýymen Mádenıet jáne sport mınıstrliginiń tapsyrysy boıynsha túsirilýde. Anımasııalyq fılmniń ssenarııin Ámen Qaıdarovtyń shákirti Tamara Muqanova men qazaq mıfologııasyn zertteýshi, jazýshy, kınossenarıst Zıra Naýryzbaeva jazǵan.
«Fılm jelisi Ámen aǵanyń «Qarlyǵashtyń quıryǵy nege aıyr?» fılminde jumys istegen jyldarymen tikeleı baılanysty órbıdi. Shyǵarmashylyǵyn balalar álemimen baılanystyrǵan Ámen aǵaǵa shabyt qalaı keldi, ol anımasııa ónerimen qalaı aınalysa bastady, túsirilim kezindegi basqa da bastan keshken qıyndyqtary men qyzyqtaryn búgingi kórermen bilýi tıis dep oılaımyn. Negizgi málimetter men ádebı derekter B.Nógerbekovtiń «Kogda ojıvaet skazkı» kitabynan alyndy. Fılm tarmaqty táji aspanǵa jetken erekshe alma aǵashynyń aq-qara syzbasynan bastalady, jelmen birge sybdyrlaǵan úlken japyraqtary men jerdiń qalyń qatparyna sińip, qunarlana túsken tamyrlary ulttyq anımasııanyń sımvolıkalyq beınesi ispetti. Ámen aǵa aǵashynyń ereksheligi de sol. Muqııat zerttegende, almalar dóńgelek qańyltyr jáshikter bolyp shyǵady ( ol kezdegi fılmder dóńgelek qańyltyr jáshikterde saqtalǵan)», dedi fılmniń qoıýshy rejısseri Janádil Baıdarbekov.
Rejısser Janádil Baıdarbekov – kóptegen qysqametrli jobalardyń avtory. «Balapan» telearnasyna túsirgen serıaldaryn kishkentaı kórermender súıip tamashalaıdy. Onyń 2021 jyly túsirgen «Yrysty ydystar» atty 20 serııadan turatyn jumysy Ámen festıvalinde «Eń úzdik teleserıal» nomınasııasyn jeńip aldy. «Ámen aǵanyń ǵajaıyp aǵashy» jumys ataýymen qolǵa alǵan anımasııalyq fılmin jasaýǵa on shaqty maman jumyldyrylǵan. Jospar boıynsha jyl sońyna deıin týyndyny aıaqtaý mindeti tur.
«Jalpy 10 mınýttyq fılm jasaýǵa keminde jarty jyl ýaqyt ketedi. Qazir bizde tehnıkalyq turǵydan biraz qıyndyqtar bar. Sebebi sýrette tek mýltfılm jasaýshylardy ǵana emes, Ámen aǵanyń janynda jumys istegen Nurǵısa Tilendıev, Oljas Súleımenov syndy mádenıetimizdiń kórnekti qaıratkerleriniń, ózge de belgili tulǵalardyń obrazyn, túr álpetin barynsha uqsatyp jasaý úlken jaýapkershilikti júktep otyr», deıdi jas rejısser.
Jańa anımasııalyq fılm qazaqstandyq kórermenge aldaǵy jyldyń kóktem aıynda Ámen Qaıdarovtyń 100 jyldyq mereıtoıy qarsańynda jol tartady.
