Memlekettik keńesshiniń aıtýy boıynsha, Parlament qabyldaǵan saıası reformalardyń paketi Qazaqstannyń jańa demokratııalyq úlgige kóshkenin bildiredi. Bul úlgide Prezıdent bir merzimge qaıta saılaný quqyǵynsyz saılanady. Onyń ústine bul norma ózgerissiz qalady jáne qaıta qaraýǵa múmkin bolmaıdy.
Sondaı-aq Konstıtýsııalyq sot sýdıalarynyń ókilet merzimi prezıdenttik jáne parlamenttik ókilet merzimderinen uzaqtaý bolmaq.
«Bul reformalardyń paketin buryn iske asyrylǵan konstıtýsııalyq reformamen birge qaraý qajet: jańa Konstıtýsııalyq sot ınstıtýty quryldy; bir mezgilde Parlamenttiń ókilettigi keńeıip, Prezıdenttiń ókileti qysqartyldy; aralas saılaý júıesi engizilip, partııalardy tirkeý rásimin ońaılady; óńirlerdiń derbestigin kúsheımek», dep jazdy ol óziniń telegram kanalynda.
Erlan Qarınniń pikirinshe, endi saıası ınstıtýttardy qaıta iske qosý qajet. Al ol úshin prezıdenttik jáne parlamenttik saılaýlar ótkizý kerek.
«Munyń bári, túptep kelgende, memlekettik qurylymnyń ınstıtýsıonaldyq kelbetin bılik tarmaqtarynyń arasynda barynsha teńgerim qalyptastyra otyryp túzedi. Jańa memlekettik model bıliktiń udaıy rotasııalanýyn, saıası júıeniń boljamdylyǵy men ornyqtylyǵyn qamtamasyz etedi jáne tutastaı alǵanda, memleketimizdiń odan ári damýyn tek demokratııalyq bastaýlarda, saıası básekelestik negizinde baıandy etedi. Basqasha aıtqanda, reformalardyń jańa paketi saıası júıeniń ózgerý prosesin aıaqtaıdy. Endi barlyq negizgi saıası ınstıtýttardy (Prezıdent, Parlament, máslıhattar, Úkimet) qaıta iske qosý mindeti tur. Onyń birinshi kezeńi Joldaýda jarııalanǵan prezıdenttik saılaý bolady», dep jazdy Memlekettik keńesshi.
