QR IIDM Avtomobıl joldary komıteti men «Qazaqstan jol ǵylymı-zertteý ınstıtýty» AQ-nyń uıymdastyrýymen ótken kóshpeli semınar-trenıngke jol qurylysyn jobalaý jáne qyzmet kórsetý salalaryndaǵy mekemeler men mamandar qatysty. Sonymen qatar basqosýǵa ǵalymdar, merdiger kompanııa ókilderi men kásipkerler, «QazAvtoJol» UK, «Jol aktıvteriniń ulttyq sapa ortalyǵy» qyzmetkerleri jáne oblys ákimdikteriniń mamandary da shaqyryldy.
Jıyn barysynda Avtomobıl joldary komıtetiniń tóraǵasy Tólegen Abdýllın semınar Memleket basshysynyń 2025 jylǵa deıin joldardyń sapasyn jaqsartý jónindegi tapsyrmasyn iske asyrý sheńberinde Indýstrııa jáne ınfraqurylymdyq damý mınıstri Qaıyrbek О́skenbaevtyń bastamasymen uıymdastyrylyp otyrǵanyn jetkizdi.
«Prezıdent avtomobıl joldary salasyna erekshe mán beredi. Qasym-Jomart Toqaev Qazaqstan halqyna arnaǵan bıylǵy Joldaýynda jergilikti mańyzy bar joldarǵa jete nazar aýdaryp, bul taraptaǵy birqatar máseleni atap ótti. Árıne, aımaqtarda túıini tarqatylmaǵan túıitkildi jaǵdaıattar barshylyq. Osy oraıdaǵy máselelerdi ońtaıly sheshý úshin búgingi jıyn ótkizilip otyr. Basqosýǵa otandyq jáne sheteldik jol salasynyń bilikti mamandary qatysýda», dedi Tólegen Abdýllın.
Semınar-trenıng jumysy «jer qyrtysynyń tómengi qabaty jáne negizi», «jol jabyny», «joldy kútip ustaý jáne jóndeý», «joldaǵy qaǵıdalar men jol qozǵalysynyń qaýipsizdigi», «kópir qurylysy jáne ony jóndeý jumystary kezinde qoldanylatyn materıaldar men jańa tehnologııalar» baǵyttary boıynsha júrgizildi. Árbir bólimde jol ınfraqurylymy men nysanynyń qyzmet kórsetý merzimin uzartýǵa jáne onyń ónimdilik sıpattamalaryn jaqsartýǵa septesetin ınnovasııalyq materıaldar men qurylys jumystaryn jyldamdatýǵa yqpal etetin zamanaýı tásilder jan-jaqty qarastyryldy.
Ásirese, kópshilik tarapynan joldyń tósenishtik qabatynyń beriktigin qamtamasyz etetin materıaldar qyzyǵýshylyq týǵyzdy. Sonymen qatar jol bıtýmynyń sapasyn arttyryp, ony Qazaqstannyń túrli klımattyq jaǵdaılaryna beıimdigin qamtamasyz etetin modıfıkasııalyq asfaltbeton jabynyna da úlken yqylas tanytyldy.
Jıyn aıasynda reseılik jol qurylysy salasyndaǵy mamandar asfaltbetondy jyldyń sýyq mezgilinde tóseýge arnalǵan erekshe qospany tanystyrdy. Bul materıal elimizdiń klımatyna sáıkes keledi jáne jol qurylysy maýsymyn uzartýǵa edáýir septesedi. Atalǵan qospany qoldaný arqasynda jol qurylysyn júrgizetin kompanııalar sýyq aýa-raıynda jol jabynyn eshqandaı kedergisiz sapaly túrde tóseýge múmkindik almaq.
Aıta keterligi, «Jol qurylysyndaǵy ınnovasııalyq tehnologııalar men materıaldar» semınar-trenıngi jol-qurylysy uıymdary men isker top ókilderiniń ózara tyǵyz qarym-qatynas ornatýǵa eleýli yqpalyn tıgizdi.
«Qazaqstan jol ǵylymı-zertteý ınstıtýty» AQ prezıdenti Arman Alıbaevanyń aıtýynsha, basqosý sheńberinde birqatar kelisimge qol jetkizilip, jol-qurylysy jumystarynyń sapasyn arttyrý baǵytynda ınnovasııalyq jańashyldyqtardy qoldaný aıasy artty. Sondaı-aq ol aldaǵy ýaqytta osy taqilettes semınarlar turaqty túrde ótkizilip turatynyn jetkizdi.
