О́ńir basshysy oblys aýmaǵynda qoǵamdyq tártipti saqtaýdy, patrýldeýdi kúsheıtýdi jáne halyq arasynda kóshi-qon zańnamasyn saqtaý boıynsha túsindirý jumystaryn júrgizýdi tapsyrdy.
Shekara mańyndaǵy aýdan-aýyldardyń ákimderi men turǵyndaryna shekarany zańsyz kesip ótý faktileri, kúdikti adamdar týraly habarlaý úshin kezekshi telefon nómirleri taratylǵan.
Batys Qazaqstan oblysynyń shekara aýmaǵynda 6 avtomobıl ótkizý pýnkti jumys isteıdi. 20-23 qyrkúıek aralyǵynda bul beketterden Reseı Federasııasynyń 8658 azamaty ótken.
«Jolaýshylar aǵynynyń 3 ese ósýi baıqalady», deıdi mamandar.
Sondaı-aq shekaranyń Reseı jaq betinde júk jáne jeńil avtokólikterdiń jınalýy baıqalady.
Búginde barlyq shekara mańyndaǵy ótkizý pýnktteri qalypty jaǵdaıda jumys isteýde.
Elimizdiń zańdary boıynsha shetel azamatyn qabyldaýshy tarap ol jóninde jergilikti kóshi-qon qyzmetin habardar etýge mindetti. Bul úsh jumys kúni ishinde jasalýy kerek. Mundaı habarlamany ýaqtyly bermegen tarap ákimshilik jaýapkershilikke tartylyp, aıyppul arqalaýy múmkin.
Qazirgi ýaqytta Batys Qazaqstan oblysynda áleýmettik mańyzy bar azyq-túlik taýarlary boıynsha baǵa jaǵdaıy turaqty. Jetkizý jáne satý qalypty rejimde júzege asyrylady. Naryqta jáne qoımada azyq-túlik qory jetkilikti. Sonymen qatar óńirdiń taýar óndirýshileri jınalǵan eginniń keminde 15%-yn tapsyryp, óndirilgen ónimdi naryqtyq baǵadan 15%-ǵa tómen baǵamen oblys turǵyndaryna jetkizý jóninde memorandýmǵa qol qoıǵan.
«Qajet bolǵan jaǵdaıda monıtorıng jáne jedel sharalar qabyldaý úshin jeke shtab qurylatyn bolady. Sondaı-aq arada deldaldardy boldyrmaý úshin azyq-túlik taýarlaryna baǵa belgileýdiń deldaldyq shemalaryn tekserý jónindegi komıssııa da qaralatyn bolady. Biz óńirde azyq-túlik tapshylyǵyna jol bermeı, qajetti taýarlardyń turaqty bolýyn qamtamasyz etemiz», dedi Batys Qazaqsan oblysynyń ákimi Ǵalı Esqalıev.
О́ńir basshysy jyljymaıtyn múlik naryǵynda, sondaı-aq jolaýshylar tasymalynda eń ózekti máseleniń biri – zańsyz qyzmetke tosqaýyl qoıý úshin tıisti organdarǵa tapsyrma berdi.
Qazirgi ýaqytta Oral qalasy mene Samara, Tolıattı, Saratov, Orynbor qalalary arasynda halyqaralyq 4 avtobýs baǵyty jumys isteıdi. Jolaýshylar aǵyny ásirese Samara baǵytynda kóbeıgen. Sońǵy kúnderi Oral qalasynan Samara qalasyna – táýligine 3 reıs, Samaradan Oral qalasyna 4 reıs júrip tur.
Samara, Tolıattı jáne Orynbor baǵytyndaǵy bıletterdiń baǵasy ózgergen joq. Saratovqa bılet baǵasy bıylǵy 8 qyrkúıekten bastap kóterilip, 7 550 teńgege jetti. Buryn ol 6 000 teńge bolatyn.
