Ashyq aspan astyndaǵy festıvalda kitaptar ádettegiden 25-30 paıyz tómen baǵada saýdalandy. Kitap saýdasy qyzý júrgenin kórdik. Soǵan qaraǵanda qazir el kitap oqymaıdy degen sózdiń ózi beker me dep qaldyq. Kitap jármeńkesi men kórmesi óz aldyna, munda «Býkkrosıng», «AvtografTime», «Kazakh-Comic», «PoezııaParty», «Blogerler qupııasy», «OYNA» balalar ınstıtýtymen birlese «Oqımyz, jazamyz, sýret salamyz!», Mono qoıylymdar jáne taǵy basqa da mádenı is-sharalardyń kýási boldyq. Mádenıet jáne sport mınıstrliginiń qoldaýymen Ulttyq akademııalyq kitaphana ujymy uıymdastyrǵan rýh merekesine mınıstr Dáýren Abaev qatysty.
«El arasynda jastar kitap oqymaıtyny týraly pikir aıtylady. Mundaǵy basty maqsat – kitapqa degen qyzyǵýshylyqty oıatý. Avtorlar men oqyrmandardy bir-birine jaqyndastyrý. Bul bastamasy ǵana. Festıval kelesi jyly jalǵasatynyna senim artamyn. Kitap jármeńkeleri ótedi, buıyrsa. Festıval qutty bolsyn!» dedi Mádenıet jáne sport mınıstri Dáýren Abaev.
«Adamzat balasy damý jolynda qaryzdar qandaı qundylyq bar desek, áýeli kitapty atar edim» depti bir ǵulama. Osynshama órkenıet pen qundylyqtardyń basynda turǵan qattamanyń neshe atasy osy festıval barysynda kórsetildi. Balalar ádebıetinen bastap ult qazynasyna aınalǵan týyndylar, álemdik klassıkalar, túrli salalyq kitaptar, otbasylyq dúnıeler – bári osynda.
«Shyn máninde, qazir kitapqa degen yqylas, nıet durys jolǵa qoıylyp keledi. El kitap oqıtyn boldy. Osydan birneshe aı buryn Almatyda ashyq aspan astynda kitap jármeńkesi ótti. Sol kitap jármeńkesi respýblıka kólemine tarady. Kitapqa bet burý – mádenıettiń belgisi. Shekspır «kitap maǵan taqtan da qymbat» depti. Asqar Súleımenov «jaqsy kitap uıattyń antologııasy» degen. Sondyqtan búgingi mereke qutty, qaıyrly bolsyn!» dedi halyqaralyq «Alash» ádebı syılyǵynyń laýreaty, aqyn Maraltaı Raıymbekuly.
Respýblıkalyq kitap festıvaline Qazaqstannyń ár aımaǵynan 74 kitaphana qatysty. Barlyǵy 130-dan astam mádenı-rýhanı shara josparlanyp, uıymdastyrylǵan. Is-sharaǵa qatysýshylar festıvaldyń tııanaqty ótýine uıytqy bolǵan Ulttyq akademııalyq kitaphana ujymy men onyń basshysy Ǵazıza Qudaıbergenniń eńbegin atap ótti. Fılologııa ǵylymdarynyń doktory, professor Aıgúl Ismaqova men jazýshy, dramatýrg Roza Muqanova sóz sóılep, pikir bólisti. Sondaı-aq festıvalǵa «Otandastar» qorynyń ókili qatysyp, Ulttyq kitaphanamen birlese «Ár qazaqqa bir kitap» aksııasyn bastaǵandaryn tilge tıek etti.
«Qandastarymyz «Otandastar» qorymen ótken kezdesýlerde qazaqtyń kórkem ádebı shyǵarmalary men tarıhı kitaptarynyń jetispeýshiligin jıi aıtady. Osy oraıda, qor Ulttyq kitaphanamen birlese otyryp «Ár qazaqqa – bir kitap» aksııasyn bastady. Is-sharanyń basty maqsaty halqymyzdyń ádebıeti, tarıhy men mádenıetinen syr shertetin kitaptardy alys-jaqyn shetelderde turatyn qandastarǵa tabystaý. Endeshe, «Kitap qoryn jınaıyq, sheteldegi qandastarǵa syılaıyq» degen uranmen barshańyzdy kitap jınaý aksııasyna belsene qatysýǵa shaqyramyn», dedi «Otandastar» KeAQ prezıdenti Abzal Saparbekuly.
Ashylý saltanatyna deıin de qyzyp jatqan kitap jármeńkesi odan keıin de tolastamady. Qoly jetken avtorlardan oqyrmandar qoltańba aldy. Ásirese zeıindi oqýshylarǵa qyzyqty dúnıeler qoıylyp, kitap avtorlaryna suraqtar qoıdy. Aqyndar óleń oqysa, jazýshylar ónegeli oıyn ortaǵa saldy. Sóıtip, tańerteń bastalǵan festıval keshke deıin kitapqumar eldiń kózaıymyna aınal.
