Bul qujattyń syryna úńilgen janǵa kóp málimetter ashylary anyq.
– Orynbordaǵy Kerýen saraı kesheninde osynda turatyn Ahmet Baıtursynulynyń týystarymen kezdestik. Alash ardaqtysynyń jıeni Aqash (Ábilqasym) Jolmyrzauly Balmaǵanbetov Oktıabr aýylynda turady eken. Ol Aqańnyń ákesi Baıtursynnyń kishi inisi Erǵazynyń uly Juqannyń qyzy Nurzıpadan týady. A.Baıtursynuly qurastyrǵan «23 joqtaýda» «Erǵazynyń joqtaýy» degen joqtaý bar. Erǵazy – Aqańnyń ómirinde orny erek adam. Aıdaýǵa ketip bara jatqan Baıtursyn balasyn oqýǵa berýdi osy inisine amanattaıdy. Inisi amanatqa qııanat qylmaıdy. Sóıtip ákesinen tirideı aıyrylǵan Ahmet Torǵaı mektebiniń shákirti atanady. Núrzıpa – Erǵazynyń nemeresi», deıdi aqsaqal.
Ekspedısııanyń taǵy bir oljasy Aqań alǵash eńbek jolyn bastaǵan qazirgi Aqtóbe oblysy Alǵa aýdanynyń Qaraǵash aýylynan tabyldy. Ibrahım qarııanyń aıtýynsha, munda Aqańdy muǵalimdikke shaqyrǵan Ahmetkereı Qosýaqovtyń úı-jaıy, mektebiniń orny bertinge deıin turǵan.
– Urpaqtary irgetasynyń ornyn kórsetip berdi. Aqańnyń tabany tıgen orynnan tábárik dep tas alyp, qorjynymyzǵa saldyq. Ony keıin Torǵaıdaǵy mýzeıge tabystadyq. Qaraǵashtyń turǵyndary Alash qaıratkeriniń esimin aıryqsha qurmet tutady. Aýyldaǵy Ahmet Baıtursynuly atyndaǵy mektep túlekteriniń kemeńgerdiń músinin ornatýy sonyń aıǵaǵy. Aqtóbe jerinen tapqan oljamyzdyń zory – Aqańnyń qyzy Sholpannyń óz qolymen jazǵan hattary boldy. Asyldyń synyǵynyń sııasy tamǵan qundy derekterdi qart qalamger Ibadolla Asqarovtan aldyq. Bul qujattarǵa súıensek, Alashtyń ardaqty uly 1937 jyly 8 jeltoqsanda atylǵan. Boljam boıynsha, súıegi Almatynyń irgesinde, Jańalyq aýylyndaǵy saıası qýǵyn-súrgin qurbandary mýzeıiniń aýmaǵynda jatýy múmkin. О́ıtkeni atý jazasyna buıyrylǵandar osynda qalaı bolsa solaı kómilgen, – deıdi Ibrahım ataı.
Qarııa jetekshilik etken ekspedısııa osy Jańalyqtan bir ýys topyraq alyp kelipti. Ol ult ustazynyń 1 qazanda ótetin toıynda Sarytúbektegi halyqtyń kúshimen turǵyzylǵan Aqańnyń eńseli kesenesine salynady.
– Osy ekspedısııany sátti úılestire bilgen belgili jýrnalıst Názıra Járimbetovaǵa «Sanaly urpaq» qoǵamdyq qoryna jáne Rımma Bekturǵanovaǵa alǵys aıtamyn. Uzaq ta qıyn saparda maǵan serik, súıeý bolǵan aqyn balam Abylaı Maýdanov pen Qaırat Eleýsizge de rızamyn, – deıdi aqsaqal.
Ibrahım aqsaqal aldaǵy ýaqytta ult ustazynyń tabany tıgen Sháýeshek óńirine baryp qaıtýdy kózdep otyr.
Qostanaı oblysy
