Osynsha turǵynnyń ishinen turaqty túrde sportpen 44 962 adam shuǵyldanady. Sportqumarlar úshin qalada 18 sport nysany jumys isteıdi jáne memlekettik baǵdarlama aıasynda demeýshilerdiń qoldaýymen angarlyq úlgidegi 6 kópfýnksıonaldy sport zalynyń jáne 2 sport kesheniniń qurylysy júrgizilip jatyr. Al Jańaózende 2007 jyly jumysyn bastaǵan karate-do kekýshınkaı úıirmesinde qazirgi tańda 400-den astam sportshyny 5 jattyqtyrýshy jattyqtyrady. Osy ýaqytqa deıin 159 razrıadty sportshy, 50 Qazaqstan Respýblıkasynyń sport sheberine úmitker, 10 Qazaqstan Respýblıkasynyń sport sheberi, 2 halyqaralyq dárejedegi sport sheberi shyqty. 2013 jyly Bek О́mirzaq jáne Murat Jáýmitbaev Baký qalasynda ótken álem chempıonatynda karate-do kekýshınkaıdan álem chempıony atansa, Amanqan Qydyrjan eki dúrkin álem chempıony atandy.
Sport salasynda aýyz toltyryp aıtarlyq jeńisi bar, el qorjynyna úles salǵan Jańaózende ótken Azııa chempıonatynyń ashylý saltanatyna Mańǵystaý oblysynyń ákimi Nurlan Noǵaev, Halyqaralyq karate federasııasynyń prezıdenti Ramıl Gabbasov, Polshadan arnaıy kelgen KWF halyqaralyq federasııasynyń bas hatshysy, qara belbeý 9-dan ıegeri Andjeı Drevnıak, tórt dúrkin álem chempıony jáne Qazaqstannyń eńbek sińirgen sport sheberi Ilıa Ilın, «Aq jol» partııasy Mańǵystaý oblystyq fılıalynyń tóraǵasy, Mańǵystaý oblystyq máslıhatynyń depýtaty Jańbyrbaı Mataev qatysty.
– Azııa chempıonatyn uıymdastyrýshylar – Karate-do kekýshınkaı federasııasyna jáne is-sharaǵa qoldaý kórsetken demeýshilerge alǵysymdy bildirgim keledi. Memleket basshysy Qasym-Jomart Toqaev Qazaqstan halqyna Joldaýynda buqaralyq sportty damytýǵa erekshe nazar aýdarý, sportty halyq arasynda tanymal etý, balalar men jastardy sport seksııalaryna tartý boıynsha naqty qadamdar jasaý qajettigin atap ótti. Osyndaı joǵary deńgeıdegi sporttyq jarystar Jańaózende alǵash ret uıymdastyrylyp otyr. Bul is-sharanyń elimiz, óńirimiz, qalamyz úshin mańyzy zor. Oblysta, aýdanda jáne qalada osyndaı mańyzdy iri jarystar ótkizý halyqtyń sportqa degen qyzyǵýshylyǵyn arttyrady jáne óz kezeginde sporttyń damýyna úlken úles qosady. Chempıonatqa qatysatyn sportshylarǵa sáttilik tileımin, – dedi Nurlan Noǵaev.
Qazaqstan, Iran, Tájikstan, Aýǵanstan, О́zbekstan, Qyrǵyzstan, Saýd Arabııasy, Reseı – barlyǵy 8 elden 400-ge jýyq sportshy qatysqan saıys tartysty ótti.
– Biz Máskeýden keldik. Biz osy elge túrli jıyndarǵa jıi kelemiz, Qazaqstan sportshylary da bizdiń is-sharalarymyzǵa jıi qatysady. Komandamyzda 12 sportshy bar, olardyń arasynan ártúrli salmaq dárejesindegi keıbir sportshylar jartylaı fınalǵa shyqty. Bul sport túrinen álemdik deńgeıde bizdiń basty qarsylasymyz – Qazaqstan. Birneshe jyl buryn Azııa chempıonaty Astanada ótti. Aqtyq jekpe-jekte 14 sanattyń 12-sinde Reseı men Qazaqstan komandalary kezdesken bolatyn. Búgingi chempıonattyń aýqymy keń. Bizdi qala halqynyń, jankúıerlerdiń jyly qarsy alǵany qýantady, – dedi Halyqaralyq karate federasııasynyń prezıdenti Ramıl Gabbasov.
Jarys qorytyndysy boıynsha 1-oryndy Qazaqstan sportshylary, 2-oryndy Saýd Arabııasy ıelendi, komandalyq esepte 3-oryndy Qyrǵyzstan men Tájikstan ózara bólisti.
Mańǵystaý oblysy
