Mektep dırektory Saltanat Shabajanova Qasym-Jomart Toqaevqa oqý ornynyń tereń tarıhy týraly aqparat berip, gımnazııanyń jańartylǵan kabınetterin kórsetti.
Oqýshylar mektep kitaphanasynda Memleket basshysyna Ramazan Toqtarovtyń shyǵarmashylyǵy boıynsha «Oqýǵa qushtar mektep» jobasyn tanystyryp, jazýshynyń «Ertis muhıtqa quıady» atty kitabyn syıǵa tartty.
Sodan keıin Prezıdent respýblıkalyq jáne halyqaralyq pán olıpıadalarynyń jeńimpazdary men júldegerlerin daıyndaǵan Pavlodar oblysynyń pedagogtarymen áńgimelesti.
Qasym-Jomart Toqaev olardy Dúnıejúzilik Ustaz kúnimen jáne qazaqstandyq pedagogtardyń ótken kásibı merekesimen, al gımnazııa ujymyn mereıtoıymen quttyqtady.
– Muǵalim bolý – eń abyroıly eńbek. Sonymen birge bul – óte jaýapty jumys. Ustazdyq – qasıetti qyzmet desek te artyq emes. Sebebi ár shákirttiń tulǵa bolyp qalyptasýynda ustazdyń orny erekshe, – dedi Memleket basshysy.
Qasym-Jomart Toqaev Pavlodar oblysy ulttyń qaıta órleý ortalyqtarynyń biri ekenin atap ótti. Onyń aıtýynsha, qazaqstandyq kóptegen tanymal ǵalym osy óńirde ósken jáne qazirgi pedagogtar aǵa baýynnyń izin jalǵap keledi.
– Jastarymyzdyń otanshyl, ádil, adal jáne eńbekqor bolyp ósýine ustazdyń qosatyn úlesi orasan zor. Biz jastardyń eńbekke qulshynysyn arttyrýymyz qajet. Ádiletti Qazaqstanda eńbek adamy eń birinshi orynda turady. Sebebi otanshyldyq, eń aldymen, týǵan elińiń ıgiligi úshin qyzmet etý degen sóz. Ol úshin, árıne, eńbekqor, isker bolý kerek. Árkim óz bolashaǵyna ózi jaýapty ekenin jastar bala kezden tereń uǵynyp ósýge tıis. Bul ıdeıalardyń bárin balalardyń sanasyna mindetti túrde sińirý kerek. Uly Abaı aıtqan «Tolyq adam» uǵymy – bolmysy kemel, kózqarasy tereń, kókiregi oıaý, eńbekqor adam degendi bildiredi. Halqymyz «Ustazy jaqsynyń – ustamy jaqsy» beker aıtpaǵan, – dedi Qasym-Jomart Toqaev.
Memleket basshysy Cherchılldiń «Muǵalimderde memleket basshylary armandaıtyn bılik bar» degen sózin tilge tıek etip, mektepterde jeke adamnyń da, tutas memleketterdiń de shynaıy básekelestik negizi qalanatynyn atap ótti.
Qasym-Jomart Toqaev qoǵamdyq jáne jeke qundylyqtar júıesin qaıta jańǵyrtý kerek ekenin aıtty. Prezıdenttiń aıtýynsha, biz ulttyq dástúrlerimizdi saqtaı otyryp, qoǵamda progressıvti uǵymdardy belsendi dáripteýimiz qajet. Bul – eńbekqorlyq, bilim kýlti, ózara syılastyq, yntymaqtastyq, senim, iskerlik, uqyptylyq, synı oılaý syndy qasıetter.
Prezıdent ulttyń jańa qarym-qabiletterin qalyptastyrýda jáne Ádiletti Qazaqstandy qurýda muǵalimder sheshýshi ról atqaratynyna senim bildirdi.
Pavlodar oblysynyń pedagogtar qaýymynyń atynan №8 orta mektep-lıseıiniń orys tili men ádebıeti pániniń muǵalimi Irına Shevchenko jáne Muzafar Álimbaev atyndaǵy orta mekteptiń mýzyka pániniń muǵalimi Baqythan Orazbek sóz sóıledi.
