Sapar barysynda jumys toby Mańǵystaý oblysy ákimdigi janyndaǵy Sybaılas jemqorlyqqa qarsy is-qımyl jónindegi komıssııanyń otyrysyna qatysty. Otyrys Mańǵystaý oblysynyń ákimi Nurlan Noǵaevtyń tóraǵalyq etti.
Jıynda jemqorlyq sebepterin anyqtap, olardyń aldyn alý, táýekelderdi joıý jáne qoǵamda parasattylyq mádenıetin qalyptastyrý baǵytyndaǵy jumystar talqylandy.
Is-shara barysynda Prevensııa qyzmetiniń basshysy Saıan Ahmetjanov sybaılas jemqorlyq táýekelderin anyqtaýda ishki taldaý jumystarynyń mańyzdylyǵy týraly aıtty.
«Memlekettik organdarda jemqorlyq táýekelderin taldaýdyń mańyzdylyǵyn túsiný kerek. Taldaý barysynda qyzmettiń barlyq baǵyttaryn qamtı otyryp, sybaılas jemqorlyqtyń sebepteri men jaǵdaılaryn joıý boıynsha usynymdar engizý qajet.
Agenttik halyqty tolǵandyratyn, sheshilmeı kele jatqan problemalyq máselelerdi qamtıtyn Sybaılas jemqorlyq táýekelderiniń kartasyn ázirledi. Mańǵystaý oblysy boıynsha medısına, jol jáne ınfraqurylym, jer, olıgopolııa, ekologııa salalary sybaılas jemqorlyq táýekelderi kartasyna engizilgen. Táýekelder kartasyna engizilgen salalar boıynsha jumystardyń tıimdiligin arttyrý maqsatynda belsendi azamattar men qoǵamdyq birlestikterdiń kúsh biriktirýi asa mańyzdy», dedi Saıan Ahmetjanov.
Sondaı-aq, Agenttiktiń Mańǵystaý oblysy boıynsha departamentiniń basshysy Ádilhan Áshirbaev óńirdegi jemqorlyq kórinisterine toqtaldy.
Ol «О́ńirimizde bıyl sybaılas jemqorlyq qylmys sany eki esege artqan. Qylmys qurylymynda paraqorlyqtyń úlesi jyldan–jylǵa ósýde» dep atap ótti.
Budan bólek, Departament 3 syrtqy taldaý jumysyn júrgizip, birqatar sybaılas jemqorlyq táýekelderin anyqtaǵan. Sondaı-aq, qylmystardyń aldyn alý maqsatynda ákimshilik quqyq buzýshylyqtar tájirıbesi negizinde 21 tulǵa ákimshilik jaýapkershilikke tartylyp, 25 mln teńge kóleminde aıyppul salynǵan.
О́z kezeginde, oblys ákimi quqyqbuzýshylyqtardyń aldyn alý jóninde aıtty.
«Sybaılas jemqorlyqqa deıin jetkizbeı, kez-kelgen zańsyz áreketterdiń aldyn alý kerek. Jemqorlyq táýekelderi baıqalǵan jaǵdaıda der kezinde toqtata bilý tıis. Bastysy - bıýdjet esebinen salynyp jatqan obektiler sapaly turǵyzylyp, olardyń belgilengen merzimde tapsyrylýy, adamdardyń aýyz sýmen jáne sapaly jolmen qamtamasyz etilýi mańyzdy. Qazirgi tańda qoǵamnyń memlekettik mańyzdy sheshimderge aralasýy qajetti deńgeıde oryndalyp jatyr. Árbir memlekettik organ halyqpen keri baılanys tetikterin udaıy jetildirip, jurtshylyqpen tyǵyz qarym - qatynas jasaýy tıis», - dedi Nurlan Noǵaev.
Keńes qorytyndysy boıynsha Mańǵystaý oblysynyń ákimi Nurlan Noǵaev aıtylǵan usynystardy eskerýdi, sondaı-aq turǵyndardyń áleýmettik mańyzdy problemalaryn ýaqytyly sheshýdi tapsyrdy.
