«Qazir Reseımen birlesip Edil ózenin saqtaý boıynsha úlken federaldy baǵdarlama júrgizip jatyrmyz. Sebebi Edil Kaspıı teńizine de quıylady. Edildiń jyldyq aǵyny shamamen 250 mıllıard tekshe metr sýdy quraıdy. Bul jumystarmen Reseı tarapy aınalysady. Bizdiń tarap Jaıyq ózenin saqtaý boıynsha is-shara keshenin júrgizýde», dedi Serikqalı Brekeshev Senatta ótken brıfıngte.
Mınıstrdiń aıtýynsha, sońǵy birneshe jyl ishinde ózenniń jyldyq aǵyny eki ese azaıdy.
«Buǵan klımattyq ózgerister men Reseı aýmaǵyndaǵy ózen aǵynynyń joǵary rettelýi sebep bolýy múmkin. Reseıde kóptegen sý qoımalary salyndy. Biz kórshi memleketpen osy baǵytta jumys istep jatyrmyz», dedi vedomstvo basshysy.
Onyń aıtýynsha Jaıyqty saqtaý jumystary 2024 jyly aıaqtalady dep kútilýde.
«Bul jumysty 2024 jylǵa deıin aıaqtaýdy josparlap otyrmyz. Is-sharalar keshenine ózen túbin tereńdetý, jaǵalaýdy nyǵaıtý jumystary, sondaı-aq ózen arnasyn ǵylymı zertteý jatady», dep tolyqtyrdy Ekologııa mınıstrliginiń basshysy.
