Prezıdent • 06 Qazan, 2022

Prezıdent ultty uıystyratyn jeti qaǵıdany atady

152 ret kórsetildi

Memleket basshysy Qasym-Jomart Toqaev ózin qoldaý jónindegi halyqtyq koalısııa forýmynda ultty uıystyratyn jeti qaǵıdany atady, dep habarlaıdy Egemen.kz.

Birinshi. Táýelsizdik bárinen qymbat. Men byltyr osy tujyrym týraly arnaıy maqala jarııaladym. Biz egemendigimizdi saqtaı alsaq qana, ult bolyp, el bolyp tura alamyz. Táýelsiz memleket qana óziniń tilin, jerin, dinin, dilin saqtap qalady. Sondyqtan, Táýelsizdik – biz úshin eń basty qundylyq. Táýelsizdikti qorǵaý jáne nyǵaıtý – árbir azamatqa, bárimizge ortaq mindet! Taǵy da qaıtalap aıtamyn. Damyǵan, órkenıetti el bolamyz desek, eńbekti eń basty orynǵa qoıýymyz kerek. Eńbekqorlyq – óskeleń urpaqtyń boıyna sińgen qasıet bolýǵa tıis. Bul qasıet bizdiń ómir saltymyzǵa aınalýy kerek. Masyldyq nıetten, bos sózden arylýymyz qajet. Táýelsizdikti nyǵaıtýǵa naqty ispen úles qosý – ár azamattyń perzenttik paryzy. Eńbek adamy bizdiń qoǵamda qashanda qurmetke ıe bolady. Sebebi, eńbekqor adam óz sózin árdaıym ispen dáleldeı alady

Ekinshi. Eldiktiń negizi – jerimizdiń tutastyǵy. Babalarymyz urpaǵyna ulan-ǵaıyr jerdi mıras etti. Biz onyń bir ýys topyraǵyna deıin qasterlep, atamekenimizdi qorǵaı bilýimiz kerek»

Úshinshi. Memleket múddesi – qasterli qundylyq. Aýyldan Aqordaǵa deıingi sheshimniń bári osy turǵydan qabyldanýy qajet. Bir sózben aıtsaq, ár iste memlekettik ustanym bolýy kerek. Memleket múddesi degenimiz – halyqtyń múddesi. Sondyqtan, barlyq sheshimder, jobalar, zańdar men jarǵylar el múddesin qorǵaýǵa arnalady. Týǵan elge janashyrlyq ár azamatqa tán qasıet bolýǵa tıis. 

Tórtinshi. Rýhanı úndestik – birliktiń bastaýy. Tól tarıhymyz, ana tilimiz ben ata dinimiz – eldi biriktiretin biregeı qundylyqtar. Ony daý-damaıǵa aınaldyrýǵa bolmaıdy. Jurtty adastyryp, teris jolǵa salýdan saqtanǵan jón. Qazaqstanda túrli etnos ókilderi ómir súrip jatyr. Olardyń maqsaty – bir, bolashaqqa degen kózqarasy – ortaq. Bárimiz – bir eldiń azamattarymyz. «Áralýandyq arqyly – birlikke» qaǵıdaty eshqashan ózektiligin joǵaltpaıdy. Biz etnosaralyq tatýlyqty saqtaı bilýimiz kerek. «Qazaqstan azamaty» degen uǵym jalpyulttyq biregeıliktiń ózegi bolýy qajet. Sonda birtutas ult retinde keleshekke senimmen qadam basamyz.

Besinshi. Zańdylyq pen tártip – órkenıetti el bolýdyń kepili. Zań talaptary barlyq salada múltiksiz oryndalýǵa tıis. Zań aldynda – bári teń. Zań aldynda bári birdeı jaýap beredi. Sonda ǵana biz zańy múltiksiz oryndalatyn, tártibi qatań saqtalatyn Ádiletti memleket quramyz»

Altynshy. Jasampazdyq – jańarý men jańǵyrý joly. Bizdiń basty maqsatymyz – Otanymyzdy órkendetý, memleketimizdi damytý. Ozyq bilim men qajyrly eńbek qana eldi tabysqa jetkizedi. Básekege qabiletin arttyrýǵa múmkindik beredi. Qazir ǵylym ekonomıkany jedel alǵa jeteleıtin alyp ındýstrııaǵa aınaldy. Qazaqstan jahandyq ekonomıkadaǵy úrdisterden saı bolýǵa tıis. Bizge de osy ǵylymı-tehnologııalyq jańashyldyqty ákelip, óndiriske qosatyn jańa ári bilikti mamandar kerek. Biz olarǵa qajet jaǵdaıdyń barlyǵyn jasaımyz. Sebebi, adam kapıtaly eń qundy baılyǵymyz. Muny ýaqyt jáne tájirıbe dáleldedi. Osylaısha, Qazaqstannyń ınnovasııanyń, jańa tehnologııanyń, tyń ıdeıalardyń, aýqymdy kapıtaldyń ortalyǵy bolýǵa zor múmkindigi bar.

Jetinshi. Dostyq peıil, meıirimdilik jáne janashyrlyq – eń asyl qasıetter. Qazaqta «Syılassań – syıly bolarsyń» degen sóz bar. Aǵaıynnyń tatýlyǵy men janashyrlyǵy – el birliginiń túp qazyǵy. Eldiń tutastyǵy qarapaıym adamdardyń ózara túsinistiginen bastalady. Halqymyz bárin de aqyl-parasatpen sheshken. Bul dástúrdi umytpaýymyz kerek. Aǵa býyn osy ıgi dástúrdi nasıhattaýy qajet. Jalpy, ortaq jetistikter ulttyń mereıin ósiredi. Biz bir-birimizge qashanda tilektes bolýymyz qajet. Talapty, daryndy azamattardy qoldaı bilýimiz kerek. Ár otandasymyzdyń tabysyna qýanyp, qıyndyqtardy birge eńserýge tıispiz. Halqymyz «Uıymdasqan utady» dep beker aıtpaǵan. Birligimizdi bekemdeı bilsek, eldigimizdi saqtap qalamyz. Sonda ǵana Ádiletti Qazaqstandy quramyz.

Sońǵy jańalyqtar

Ekibastuz: Taǵy 9 úıge jylý berildi

Aımaqtar • Búgin, 21:02

Senatorlar ózekti máselelerdi talqylady

Parlament • Búgin, 14:03

ÁCh 1/8 fınalynda kimder oınaıdy?

Fýtbol • Búgin, 12:40

Bir táýlikte 173 adam koronavırýs juqtyrǵan

Koronavırýs • Búgin, 11:02

Uqsas jańalyqtar