8 qazan Ekibastuz polısııasyna 64 jastaǵy qala turǵyny júginip, onyń 69 jastaǵy jubaıyn izdeýge kómek kórsetýdi suraǵan.
Onyń aıtýynsha, 5 qazan saǵat 12:30 shamasynda er adam ÝAZ kóligin basqaryp, tanysymen birge balyq aýlaýǵa ketken. Sol ýaqyttan beri olar úıine oralmaǵan.
«Bul ótinish tulǵanyń joǵalýy faktisi boıynsha sotqa deıingi tergeýdiń biryńǵaı tiziliminde tirkeldi. 9 qazanda Kýtoıaksor kóliniń janynan ÝAZ kóligi tabyldy. Tekserý barysynda kólik ıesiniń qujattary, aqshasy, uıaly telefondar, avtokóliktiń kilti mashınanyń salonynan tabyldy. Kólikte rezeńke qaıyq bolmady, biraq qutqarý keýdesheleri sol jerde jatty. Polısııa atalǵan kól mańyndaǵy eki azamattyń ketýi yqtımal jerlerde jedel-izdestirý is-sharalary júrgizilip jatyr», dep jazylǵan Polisia.kz taratqan habarlamada.
Jergilikti jerde polısııa, TJ qyzmetkerleri, súńgýirler, kınologtar men eriktiler jumys istep jatyr.
