Qazaqstan halqy saıası ózgeristerdiń mańyzyn túsinip, Prezıdenttiń bastamalaryn qoldaıdy. Sonyń birden-bir dáleli – 2022 jylǵy maýsymda ótken jalpyhalyqtyq referendýmǵa el azamattarynyń kópshiliginiń qatysýy. Memleket basshysy kezekten tys prezıdent saılaýyn bıyl ótkizý jóninde sheshim qabyldady. Aldaǵy saılaýdy Qazaqstan tarıhyndaǵy jańa sapaly kezeńniń bastaýy retinde qabyldaımyn. Bul – ádiletti qoǵam qurý jolyndaǵy mańyzdy qadam.
Jýyrda Memleket basshysy Qasym-Jomart Toqaevtyń Pavlodar óńirine jasaǵan saparynan, onyń jergilikti jurtshylyqpen júzdesýinen uqqanym – Prezıdent óńirdegi jaǵdaıdyń bárinen habardar eken. Memleket basshysynyń oblys túgili, árbir aýdan men qaladaǵy jaǵdaıdy nazarda ustaıtyny qýantty.
Ekibastuz jylytý maýsymyn jyl saıyn qıyndyqpen ótkizedi. Shahardy jylytyp otyrǵan jalǵyz jylý-elektr ortalyǵynyń jaǵdaıy tym nashar. Jergilikti bılik qoldan kelgenin jasap jatyr. Qasym-Jomart Toqaev óńir halqymen bolǵan kezdesýde jylý-elektr ortalyǵynyń máselesin aıtqanda, el tileginiń Prezıdentke jetkenin uqtyq. Demek endigi jerde ekibastuzdyqtardy jyldar boıy alańdatyp kelgen máseleniń oń sheshim tabaryna senemiz. Qystyń kózi qyraýda. Alda ne bolaryn bilmeımiz, boıda qorqynysh bar. Prezıdenttiń búgingi sózi úreı qushaǵynda otyrǵan ekibastuzdyqtarǵa zor úmit syılady.
Jalpy, Prezıdent Pavlodar óńirindegi túıindi máselelerdi de, aımaqtyń damýyn qamtamasyz etetin basym baǵyttardy da atap, aıqyndap berdi. Sonyń ishinde jastarǵa múmkindik beriletinin basa aıtty. Jastarǵa senim arta otyryp, jaýapkershilikti sezindirý mańyzdy. Prezıdenttiń qaı salada bolmasyn jastarǵa jaǵdaı jasap, múmkindik berý kerek degen pikirin tolyq qoldaımyn.
Jas urpaq aǵa býynnyń ómir jolynan taǵylym ala bilýi kerek. Shetelde júrgen jastarymyzdyń kez kelgen sátte elge oralýyna múmkindik bar. Tipti shetelde júrse de sol jaqtan el múddesine qyzmet jasaı alady. Prezıdent atap ótkendeı, bastysy biz olarǵa memleketshildik rýhyn sińirip, el ıgiligine qyzmet etýge jumyldyra bilýimiz kerek. Qazirgi jastardyń órshil ıdeıalary men erik-jigeri Qazaqstandy damytatyn basty kúsh ekeni de anyq. Bastysy, olardyń osy áleýetin durys arnaǵa baǵyttaý kerek.
Qasym-Jomart Toqaevtyń qatysýymen ótken jıynnan kóp oı túıdik. Prezıdent oblys basshylyǵyna aýqymdy mindetter júktedi. Solardyń bári oıdaǵydaı júzege assa eken degen tilegimiz bar.
Serik ZAŃOV,
Ekibastuz GRES-2 stansasynyń aýysym basshysy,
Ekibastuz qalalyq qoǵamdyq keńesiniń múshesi
Pavlodar oblysy
